Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
BOTA
Biden dhe Trump me qëndrime të ndryshme për fuqinë ushtarake amerikane
n.fPërditësimi i fundit 31 Maj 2024, 20:46
Foto ilustruese
SHBA- Kandidatët për president Joe Biden dhe Donald Trump thonë se Amerika ka nevojë për një ushtri të fortë. Presidenti Biden thotë se ushtria amerikane është e fortë në gjendjen e tanishme. Por siç njofton korrespondenti i Zërit të Amerikës, Scott Stearns, ish-presidenti Trump thotë se presidenti Biden ka dobësuar ushtrinë amerikane, të cilën zoti Trump do ta rindërtojë kur të jetë bërë president.
Presidenti Joe Biden u tha të shtunën të diplomuarve në Akademinë Ushtarake të Shteteve të Bashkuara se Amerika nuk u ka kërkuar ndonjëherë më parë ushtarakëve të bëjnë gjëra kaq të ndryshme , në kaq shumë vende të ndryshme, të gjitha në të njëjtën kohë.
“Në këto momente, ushtarët amerikanë po mbështesin ukrainasit trima në luftën e tyre për liri. Ushtarët tanë po punojnë pa pushim për të vazhduar transportimin e municioneve dhe pajisjeve në tokë, det dhe ajër”, tha presidenti Biden.
Ndër këto angazhime është edhe Lindja e Mesme.
“Forcat Ajrore Amerikane kanë dërguar ushqime nga ajri, me dhjetëra mijëra vakte për njerëzit në Gazë. Përpara sulmit të paprecedent të Iranit ndaj Izraelit, ne bashkuam partnerët, ndër ta edhe vende arabe, për ta zmbrapsur sulmin”, tha presidenti Biden.
Ish-presidenti Donald Trump thotë se presidenti Biden po e udhëheq ushtrinë amerikane drejt një “situate jashtëzakonisht të rrezikshme”.
“Vendi ynë është poshtëruar plotësisht. Dhe kemi një president të korruptuar, të kompromentuar, Joe Biden-in, që po na tërheq drejt Luftës së Tretë Botërore. Kjo është ajo që po ndodh”, tha zoti Trump.
Ai thotë se presidenti Biden nuk duhet të rrezikojë një luftë me Rusinë apo Kinën. Në një mesazh elektoral, ish-presidenti Trump premtoi se do ta pozicionojë ushtrinë amerikane në mbështetje të një politike të jashtme që vendos interesat e Amerikës të parat.
“Do t’i kërkoj Evropës të na rimbursojë për koston e riplotësimit të rezervave në armatime që i janë dërguar Ukrainës, diçka që duhet të ishin duke e bërë tani, por Joe Biden-i është shumë i dobët dhe i parespektuar që ta kërkojë këtë”, tha zoti Trump.
Presidenti Biden thotë se ushtria amerikane po forcon aleancat dhe po investon tek masat parandaluese.
“Në mbrojtje të vlerave tona duke iu kundërvënë tiranëve, dhe duke ruajtur paqen, por duke ruajtur liritë dhe tolerancën. Falë Forcave të Armatosura të Shteteve të Bashkuara po bëjmë atë që vetëm Amerika mundet ta bëjë, si vendi i pazëvendësueshëm, si superfuqia e vetme e botës dhe vendi demokratik udhëheqës në botë”, tha presidenti Biden.
Departamenti amerikan i Mbrojtjes njoftoi se gjatë vitit fiskal 2023 u rekrutuan 40 mijë ushtarë më pak nga objektivi i vendosur.
Ish-presidenti Trump thotë se kjo ndodh pasi shumë njerëz nuk duan të shërbejnë në ushtrinë amerikane për shkak të politikave të presidentit Biden dhe largimeve nga puna me motive politike.
“Do të rikthehej kulturën krenare dhe traditat e nderuara të forcave të armatosura amerikane dhe nuk do të lejohet marksizmi, nuk do të lejohet komunizmi dhe do t’i largojmë fashistët”, tha ish-presidenti Trump.
Ushtria amerikane thotë se janë disa arsye për rënien e numrit të rekrutëve të rinj, përfshirë një ekonomi më e fortë – që u jep të rinjve më shumë opsione – dhe një mosbesim më i madh tek institucionet në radhët e të rinjve që i përkasin të ashtuquajturës Gjenerata Z, pra të lindurit gjatë viteve 1997 - 2012.
