Protesta qytetare është shtrirë në disa qytete të vendit, përfshirë Korçën, ku qytetarë janë mbledhur...
BOTA
Bixhozi online po arrin majat, ky vend drejt vendosjes së taksës rekord
PiranjatPërditësimi i fundit 19 Mars 2026, 13:11
Bixhozi online po përhapet me shpejtësi në Afrikë, dhe qeveritë po reagojnë duke rritur taksat për të frenuar rreziqet e varësisë dhe për të mbushur arkët e zbrazura të shtetit.
Në tregun më të madh të kontinentit, Afrika e Jugut, industria po kundërshton masat, duke paralajmëruar se taksat e larta mund të shtyjnë lojtarët drejt faqeve të paligjshme.
Një aktivitet që dikur ishte i vogël, bixhozi online ka eksploduar në të gjithë kontinentin për shkak të llogarive të lehta për bast online. Në Afrikën e Jugut, Bordi Kombëtar i Bixhozit vlerëson se dy të tretat e të rriturve luajnë online, një rritje e theksuar krahasuar me 30% në vitin 2017.
Qeveria ka propozuar një taksë kombëtare prej 20% mbi fitimet e bixhozit online, e cila synon të dyfishojë të ardhurat e shtetit nga sektori, duke i çuar nga 4.8 miliardë rand në 10 miliardë rand ($607 milion) në vit. Projekti i ligjit do t’u paraqitet ligjvënësve këtë vit dhe propozimi final i taksës pritet të prezantohet në shkurt 2027.
Disa parti politike kanë shprehur mbështetje për këtë masë.
Megjithatë, kompanitë e bastit po kundërshtojnë masën, duke argumentuar se taksa nuk do të frenonte bixhozin problematik, por do të shtynte lojtarët drejt faqeve të paligjshme. Për shembull, Shoqata e Bixhozistëve të Afrikës së Jugut, që përfaqëson rreth një të katërtën e bixhozistëve të vendit, propozon që qeveria të fokusojë luftën tek tregu ilegal, dhe jo vetëm tek taksat e larta.
Ndërkohë, numri i thirrjeve për ndihmë nga personat me varësi nga bixhozi ka rritur mbi dy të tretat gjatë vitit të fundit. Fondacioni për Bixhoz të Përgjegjshëm i Afrikës së Jugut trajtoi mbi 4,600 persona vitin e kaluar, nga 2,600 në 2024. Shumë qytetarë bastojnë jo për argëtim, por për të përmirësuar gjendjen ekonomike personale.
Në vende të tjera të Afrikës Jugore, si Malawi dhe Zimbabwe, janë futur taksa të ngjashme, ndërsa në Senegal, qeveria ka vendosur taksa shtesë mbi bixhozin në kuadër të planit të rimëkëmbjes ekonomike.
Ekspertët theksojnë se taksat vetëm nuk mjaftojnë; duhet politika mbështetëse për lojtarët që vuajnë nga varësia, për të parandaluar pasojat sociale dhe financiare./Përktheu Piranjat News, marrë nga Reuters
