Një skemë e frikshme dhe e paprecedentë po zhvillohet në dëm të pasurisë publike dhe private në Shqipëri, ku aset...
BOTA
Bjellorusia liron 123 të burgosur politikë, përfshirë nobelisten
PiranjatPërditësimi i fundit 13 Dhjetor 2025, 17:33
Bjellorusia ka liruar 123 të burgosur, përfshirë aktivisten e shquar të opozitës Maria Kolesnikova, pasi Shtetet e Bashkuara të Amerikës (SHBA) ranë dakord të heqin sanksionet kundër vendit të Evropës Lindore, shkruan sot BBC.
Fituesi i Çmimit Nobel për Paqen, Ales Bialacki, është gjithashtu midis të liruarve, pas bisedimeve në Minsk me të dërguarin special të Presidentit të SHBA-së, Donald Trump, për Bjellorusinë, John Cole. SHBA-të kanë rënë dakord të heqin sanksionet mbi potasin, një përbërës kyç në prodhimin e plehrave dhe një produkt i rëndësishëm eksporti i Bjellorusisë, presidenti i së cilës, Alexander Lukashenko, është një aleat i ngushtë i presidentit rus Vladimir Putin.
“Ndërsa marrëdhëniet midis dy vendeve normalizohen, gjithnjë e më shumë sanksione do të hiqen”, tha Cole, sipas BBC-së. Bashkimi Evropian (BE) nuk e njohu Lukashenkon si president. Kolesnikova ka qenë në burg që nga viti 2020 dhe e kaloi një pjesë të madhe të asaj kohe në izolim.
Motra e saj, Tatjana, e cila ka bërë fushatë pa u lodhur për lirimin e saj, mundi të fliste me të nëpërmjet video-thirrjes pak më vonë dhe e konfirmoi lajmin për BBC-në. Grupi i të liruarve pritet të mbërrijë së shpejti në kryeqytetin e Lituanisë, Vilnius.
Marrëveshja është një arritje e madhe për Lukashenkon dhe udhëheqësi autoritar do të mirëpresë gjithashtu faktin që amerikanët i kanë dhënë fund izolimit të tij ndërkombëtar, sipas BBC-së. Përveç BE-së, edhe SHBA-të nuk e njohën Lukashenkon si president, për shkak të zgjedhjeve të manipuluara pesë vjet më parë, të cilat çuan në protesta masive në rrugë që u shtypën brutalisht nga policia.
