Të ardhurat që shteti siguron nga dhënia me qira e pasurive të sekuestruara dhe të konfiskuara kanë shënuar një rritje t...
BOTA
Bloomberg: Merz përgatit plan europian për përmirësimin e marrëdhënieve me Trump para samitit të NATO-s
PiranjatPërditësimi i fundit 1 Qershor 2026, 18:14
Kancelari gjerman Friedrich Merz po punon për një iniciativë të përbashkët europiane me synimin për të zbutur tensionet me presidentin amerikan Donald Trump përpara samitit të NATO-s që do të mbahet në korrik.
Sipas Bloomberg, Merz pritet të presë në Berlin gjatë këtij muaji liderët e pesë vendeve kryesore europiane – Gjermanisë, Francës, Britanisë së Madhe, Italisë dhe Polonisë – për të hartuar një paketë masash që do të tregojë gatishmërinë e Europës për të marrë më shumë përgjegjësi në fushën e mbrojtjes.
Në takim pritet të ftohet edhe Sekretari i Përgjithshëm i NATO-s, Mark Rutte.
Nisma vjen në një moment kur marrëdhëniet mes aleatëve europianë dhe administratës Trump janë përballur me tensione të shtuara. Presidenti amerikan ka kritikuar vazhdimisht vendet europiane për qëndrimin e tyre ndaj konfliktit me Iranin dhe ka vënë në dyshim angazhimin e tyre për sigurinë kolektive brenda NATO-s.
Trump ka sulmuar gjithashtu aleancën ushtarake, duke e cilësuar në disa raste si një “tigër prej letre”, ndërsa ka kërkuar që vendet anëtare të rrisin ndjeshëm shpenzimet për mbrojtjen.
Raportet mes Trump dhe Merz janë përkeqësuar më tej pasi kancelari gjerman kritikoi strategjinë amerikane në konfliktin me Iranin. Në përgjigje, Uashingtoni njoftoi tërheqjen e më shumë se 5 mijë trupave amerikane nga Gjermania.
Ndërkohë, ministrat e Mbrojtjes të vendeve të grupit E5 do të zhvillojnë një takim të veçantë në Paris më 12 qershor. Në fokus të diskutimeve do të jetë koordinimi i qëndrimeve përpara samitit të NATO-s më 7-8 korrik në Ankara, si dhe planet e përbashkëta të sigurisë në rast të një konflikti më të gjerë në Europë.
Vitin e kaluar, shumica e vendeve anëtare të NATO-s ranë dakord të synojnë investime në mbrojtje në nivelin 5% të Prodhimit të Brendshëm Bruto, ndërsa Gjermania ka rritur ndjeshëm buxhetin ushtarak.
Merz ka deklaruar më herët se mbështetja amerikane për Europën mbetet thelbësore dhe se NATO vazhdon të jetë e pazëvendësueshme për sigurinë e kontinentit.
“Kjo aleancë është, të paktën për momentin, e pazëvendësueshme”, është shprehur kancelari gjerman.
