"Donald Trump është i mërzitur"/ Shtëpia e Bardhë i bën paralajmërim presidentit ukrainas: Durimi i tij po i mbaron, Zelensky duket se po lëviz në drejtimin e gabuar

SHBA- Presidenti amerikan Donald Trump është shumë i mërzitur me ritmin e bisedimeve që synojnë t'i japin fund luftës në Ukrainë, tha sot një zëdhënëse e Shtëpisë së Bardhë, duke argumentuar se Volodymyr Zelensky po ndërmerr hapa në drejtimin e gabuar.

"Presidenti Donald Trump është i mërzitur. Durimi i tij po i mbaron. Ai dëshiron të bëjë atë që është e drejtë për botën. Ai dëshiron të shohë paqen. Ai dëshiron që vrasja të ndalet, por edhe palët ndërluftuese duhet ta duan atë. Për fat të keq, Presidenti i Ukrainës, Zelensky duket se po lëviz në drejtimin e gabuar," u tha Caroline Levitt gazetarëve në Shtëpinë e Bardhë.

Më herët gjatë ditës së sotme, presidenti amerikan kritikoi homologun e tij ukrainas për deklaratën e tij "ngacmuese" në lidhje me Krimenë, duke akuzuar Zelensky se e bën të vështirë negocimin e një marrëveshjeje për t'i dhënë fund luftës.

“Krimea u humb vite më parë”, thekson Trump në një postim në platformën “Truth Social”, duke komentuar qëndrimin e shprehur nga Zelensky se Ukraina nuk do ta njohë aneksimin e gadishullit në Federatën Ruse.

“Askush nuk po i kërkon Zelenskit ta njohë Krimenë si territor rus, por nëse ai do Krimenë, pse nuk luftuan për të 11 vjet më parë kur gadishulli iu dorëzua Rusisë pa u shkrepur asnjë plumb?” ka shkruar presidenti amerikan.

Donald Trump përsëriti se ne jemi shumë afër një marrëveshjeje, por deklaratat nxitëse si ajo e Zelensky e bëjnë kaq të vështirë zgjidhjen e kësaj lufte, duke paralajmëruar presidentin ukrainas se ai duhet të zgjedhë midis vendosjes së paqes dhe vazhdimit të luftës për tre vjet të tjerë derisa të humbasë të gjithë vendin e tij.

donald trump