Fitoi zgjedhjet në Gjermani, Merz vë në dyshim "formën aktuale" të NATO-s: Do të na duhet të krijojmë një aftësi të pavarur mbrojtëse

GJERMANIA- Kancelari i ardhshëm i Gjermanisë, Friedrich Merz, u pyet të dielën nëse NATO do të mbetet në "formën aktuale" deri në qershor, duke patur parasysh komentet e administratës së presidentit amerikan Donald Trump dhe faktin se Evropa duhet të krijojë shpejt një aftësi të pavarur mbrojtëse.

"Nuk do ta kisha menduar kurrë se do të më duhej të thoja diçka të tillë në një shfaqje televizive, por, pas komenteve të Donald Trump javën e kaluar...është e qartë se kësaj qeverie nuk i intereson shumë fati i Evropës", i tha Merz transmetuesit publik gjerman ARD pasi konservatorët e tij fituan zgjedhjet kombëtare.

Javën e kaluar, administrata Trump tronditi aleatët evropianë duke u thënë se duhet të kujdesen për sigurinë e tyre dhe të mbështeten më pak te Shtetet e Bashkuara, ndërsa njoftoi bisedimet me Rusinë për t'i dhënë fund luftës në Ukrainë pa përfshirë Evropën. Sekretari amerikan i Mbrojtjes Pete Hegseth paralajmëroi evropianët se "realitetet e zymta strategjike" do të pengonin që SHBA të fokusohej kryesisht në sigurinë e Evropës.

Duke iu referuar një samiti të NATO-s të planifikuar për në qershor, Merz tha se ishte kurioz të shihte "nëse do të flasnin ende për NATO-n në formën e saj aktuale atëherë."

"Ose nëse do të na duhet të krijojmë një aftësi të pavarur mbrojtëse evropiane shumë më shpejt", tha Merz.

gjermania