Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet për një tjetër grup të ...
BOTA
Gjykata speciale e krimeve të luftës e Rusisë/ Ministri i jashtëm ukrainas: Ndëshkimi është i pashmangshëm për të gjithë, përfshirë Putinin
m.lPërditësimi i fundit 9 Maj 2025, 14:45
KIEV- Kievi shpreson që gjykata speciale që do të ngarkohet me detyrën për të gjykuar Rusinë për pushtimin e Ukrainës do të çojë në dënimin e Presidentit rus Vladimir Putin, tha sot në Lviv Ministri i Jashtëm ukrainas Andriy Sibiha.
Në një takim në këtë qytet ukrainas sot, Ukraina dhe aleatët e saj evropianë dhanë dritën jeshile për të krijuar një gjykatë të posaçme kompetente për të gjykuar "krimet e agresionit" të kryera nga Rusia pas pushtimit të Ukrainës në shkurt 2022. Ministria e Jashtme ukrainase njoftoi se në këtë takim morën pjesë shefja e diplomacisë evropiane, Kaya Kalas, si dhe delegacione nga 35 vende evropiane.
“Për ne, gjëja më e rëndësishme është të ruajmë parimin se ndëshkimi është i pashmangshëm për të gjithë, përfshirë presidentin rus. Kjo gjykatë po formohet për të dhënë dënime të përshtatshme në të ardhmen”, tha Sibiha.
Gjykata speciale për "krimet e agresionit", pushtim, pushtim ushtarak ose aneksim me forcë dhe bllokim i porteve ose bregdeteve, do të punojë së bashku me Gjykatën Ndërkombëtare Penale (ICC), e cila tashmë ka lëshuar urdhër-arreste ndërkombëtare kundër Putinit dhe zyrtarëve të tjerë rusë.
Në të njëjtën kohë, Sibiha deklaroi se Putini “nuk ka të drejtë” të “monopolizojë” kujtimin e fitores në Luftën e Dytë Botërore, sot kur Moska feston 80-vjetorin e fitores ndaj Gjermanisë naziste.
"Putini mund ta konsiderojë veten fitues të vetëshpallur, por nuk ka të drejtë ta monopolizojë fitoren", theksoi ai.
Presidenti rus vlerësoi “trimërinë” e ushtarëve rusë që luftojnë në Ukrainë në një fjalim që mbajti para mijëra personelit ushtarak dhe rreth 20 udhëheqësve të huaj të mbledhur në Sheshin e Kuq në Moskë. Putini edhe një herë bëri paralele historike midis Luftës së Dytë Botërore dhe pushtimit të Ukrainës nga Moska me rastin e 9 majit.
