Dritare të thyera, njolla zjarri nëpër mure: ministria e Arsimit në Tiranë mbart gjurmët e protestave të ditëve të...
BOTA
Grupi për të drejtat: Urdhri i Presidentit Trump për refugjatët do të ndikojë negativisht tek aleatët afganë të SHBA
r.llPërditësimi i fundit 22 Janar 2025, 20:01
foto ilustruese
UASHINGTON – Urdhri ekzekutiv i Presidentit Trump që pezullon programin e refugjatëve, do të ndikojë në risistemimin e mijëra afganëve, të cilët ndihmuan Shtetet e Bashkuara gjatë luftës në Afganistan, thotë një organizatë për të drejtat e tyre.
Koalicioni “AfghanEvac”, me seli në Kaliforni, që përbëhet nga organizatat që po ndihmojnë aleatët afganë të Shteteve të Bashkuara të rivendosen në SHBA, tha të hënën se pezullimi i programeve për sistemimin e refugjatëve, do të ndikojë tek aleatët afganë, të cilët po presin për t’u vendosur në Shtetet e Bashkuara.
“Mijëra aleatë afganë që plotësuan pothuajse të gjithë hapat e nevojshëm të procesit të refugjatit do të preken menjëherë nga pezullimi i risistemimit të refugjatëve dhe mijëra të tjerë, që po kalojnë nëpër këtë proces, do të mbesin në një situatë të paqartë”, tha organizata ‘AfganEvac’ përmes një deklarate të publikuar në platformën X.
Presidenti Donald Trump nënshkroi të hënën një urdhër ekzekutiv duke e quajtur Programin amerikan për Pranimin e Refugjatëve, të njohur me shkurtesën USRAP, të dëmshëm për interesat amerikane dhe e pezulloi zbatimin e tij duke filluar nga 27 janari.
“Ky vendim pezullon programin USRAP deri kur hyrja e mëtejshme e refugjatëve në Shtetet e Bashkuara të përputhet me interesat e Shteteve të Bashkuara”, thuhet në urdhrin ekzekutiv.
Ai udhëzon sekretarin e Departmentit për Sigurinë Kombëtare, që në bashkëpunim me sekretarin e shtetit, të njoftojnë presidentin brenda një periudhe 90 ditore nëse programi “përputhet me interesat e Shteteve të Bashkuara”.
Sipas drejtuesit të organizatës ‘AfghanEvac’, Shawn VanDiver, mbi 180,000 afganë janë vendosur në Shtetet e Bashkuara që nga gushti i vitit 2021, kur grupi Taliban mori pushtetin në Afganistan, e deri në dhjetor të vitit 2024.
Mijëra afganë të tjerë ende po presin që të vendosen në Shtetet e Bashkuara.
Organizata ‘AfghanEvac’ tha se urdhri jo vetëm që do të ndikojë tek afganët që janë në rrezik dhe po jetojnë duke u fshehur, por edhe tek pjesëtarët e familjeve të ushtarëve aktivë amerikane.
Sipas një njoftimi të mëparshëm të agjencisë Reuters, fluturimet e 1,660 afganëve për t’u vendosur në Shtetet e Bashkuara, që ishin konfirmuar paraprakisht nga qeveria amerikane, janë anuluar.
Por zoti VanDiver nga organizata ‘AfganEvac’ njoftoi përmes një postimi në platformën X se asnjë fluturim nuk ishte anuluar.
“Për qartësi: askujt ende nuk i është anuluar fluturimi”, shkroi ai.
Ish diplomati afgan, Omar Samad që jeton në Shtetet e Bashkuara, i tha Zërit të Amerikës se urdhri ekzekutiv është pjesë e një plani më të gjerë dhe ai do të ndikojë tek afganët të cilët po presin të vendosen në Shtetet e Bashkuara.
“Do të shqyrtohet nga agjencitë amerikane dhe ka mundësi që ndoshta Shtetet e Bashkuara do të bëjnë një përjashtim për afganët”, shtoi Samad.
Sipas zotit VanDiver, koalicioni i organizatave që ndihmojnë afganët po punon që “aleatët afganë të përjashtohen nga urdhëri i pezullimit të programit”./VOA
