Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
BOTA
Harroi dritaren hapur për tre vite, kur u kthye gjeti apartamentin të pushtuar nga qindra pëllumba
PiranjatPërditësimi i fundit 16 Qershor 2026, 11:59
Një burrë nga qyteti minerar Vorkuta në Rusi mbeti i shokuar kur u kthye në apartamentin e tij pas tre vitesh mungese dhe e gjeti atë të shndërruar në një “mbretëri pëllumbash”.
Në një video që u bë virale në rrjetet sociale, dhjetëra pëllumba shihen të ulur mbi mobilie sikur të ishin pronarët e shtëpisë, ndërsa dyshemeja është e mbuluar me jashtëqitje, pupla dhe fole.
Sipas gazetës ruse Komsomolskaya Pravda, burri ishte larguar nga Vorkuta për të punuar në Siberi, por kishte harruar një nga dritaret e apartamentit të hapur. Kjo mjaftoi që pëllumbat e zonës të vendoseshin aty, duke e kthyer banesën në një “metropol” të tyre.
“Nuk kam qenë këtu prej tre vitesh. Kur u ktheva, gjeta ‘Dubain e pëllumbave’. Ka fole, pupla dhe aq shumë papastërti sa mund të shtrosh një dysheme të re. Më shikojnë sikur unë jam qiramarrësi që nuk ka paguar qiranë. Nuk jam pronari i shtëpisë, por pushtuesi i shtetit të pëllumbave”, dëgjohet të thotë ai në video.
Pamjet u përhapën me shpejtësi në internet dhe shkaktuan reagime të shumta humoristike, por për pronarin situata nuk është aspak për të qeshur.
Ekspertët vlerësojnë se rinovimi i apartamentit dhe zëvendësimi i të gjitha mobilieve mund të kushtojë nga 1.5 deri në 2 milionë rubla, pothuajse sa vlera aktuale e vetë banesës në treg.
Përveç dëmeve materiale, apartamenti duhet të dezinfektohet plotësisht, pasi pëllumbat mund të transmetojnë sëmundje të ndryshme, përfshirë gripin e shpendëve dhe psitakozën. Muret dhe dyshemetë do të duhet të trajtohen me kimikate speciale për ta bërë sërish banesën të sigurt për t’u jetuar.
“Është më lirë të blesh një apartament të ri”, komentoi një përdorues në rrjetet sociale, ndërsa një tjetër bëri shaka duke thënë se të paktën pëllumbat i kishin lënë pronarit mëngjesin gati, duke bërë vezë brenda shtëpisë./Përktheu Piranjat News
