Nën sloganin "Asnjë shkurtim", dhjetëra mijëra studentë demonstruan në qendër të Vjenës të enjten, duke prot...
BOTA
Ilhan Omar pas bastisjes së shtëpisë: Kam frikë për jetën time dhe nuk mund të jetoj më aty me fëmijët
PiranjatPërditësimi i fundit 22 Tetor 2026, 17:48
SHBA- Kongresmenia amerikane Ilhan Omar ka deklaruar se nuk ndihet më e sigurt të jetojë në shtëpinë e saj në Uashington, pas një kontrolli të kryer nga agjentët federalë, duke përmendur kërcënimet me vdekje dhe frikën për sigurinë e familjes së saj.
Në një intervistë publike pas ngjarjes, përfaqësuesja demokrate e Minesotës tha se kërcënimet me të cilat po përballet e bëjnë të pamundur qëndrimin në banesë së bashku me fëmijët e saj. Ajo shprehu shqetësimin se të dhënat për adresën e saj mund të jenë bërë publike, duke shtuar se bastisja shkaktoi frikë te të gjithë familjarët.
Sipas raportimeve nga mediat e huaja, kontrolli u zhvillua më 12 tetor, kur agjentë të Hetimeve të Sigurisë Kombëtare mbërritën në banesën e saj në orët e para të mëngjesit. Sipas përshkrimit të Omarit, rreth 15 deri në 25 agjentë rrethuan shtëpinë dhe nisën kontrollin pasi i paraqitën urdhrin përkatës. Ajo tregoi se agjentët trokitën me forcë në dyert e banesës rreth orës 06:00, duke e zgjuar atë dhe bashkëshortin e saj.
Çifti u ngrit menjëherë për të kuptuar se çfarë po ndodhte, ndërsa situatën kongresmenia e përshkroi si të pazakontë dhe frikësuese. Kontrolli zgjati rreth pesë orë. Gjatë tij, agjentët sekuestruan 17 sende, mes të cilave telefona celularë, fletore, pajisje kompjuterike dhe një kamerë të vjetër që i përkiste bashkëshortit të saj. Pasaporta dhe kompjuterët personalë të Omarit janë përmendur gjithashtu mes sendeve të sekuestruara.
Deri më tani, autoritetet federale nuk kanë bërë të ditur se për çfarë vepre penale dyshohet kongresmenia, duke e lidhur kontrollin me një hetim penal në vazhdim. Në kuadër të çështjes, janë lëshuar gjithashtu më shumë se një duzinë thirrjesh gjyqësore për anëtarë të familjes së saj. Hetimi zhvillohet në një klimë të tensionuar politike, pasi Omar ka qenë prej kohësh objekt i kritikave nga presidenti amerikan Donald Trump dhe figura të tjera politike, të cilët kanë vënë në pikëpyetje edhe shtetësinë e saj amerikane.
Ajo e fitoi shtetësinë në vitin 2000, pasi mbërriti në Shtetet e Bashkuara nga Kenia. Ilhan Omar përfaqëson Minesotën në Kongresin amerikan që prej vitit 2018 dhe është një nga figurat më të njohura të krahut progresist të Partisë Demokratike. Deklaratat e saj pas bastisjes kanë rikthyer vëmendjen te siguria e përfaqësuesve politikë në SHBA, veçanërisht në një periudhë kur kërcënimet dhe përplasjet politike mbeten një shqetësim i vazhdueshëm.
