Surpriza më e madhe e fazës në grupe të këtij Botërori është padyshim Meksika. Një nga tre vendet organizator...
BOTA
Influencerët e Maga-s braktisin në masë Trumpin: Ka mbaruar, ka përkeqësim të gjendjes mendore!
PiranjatPërditësimi i fundit 2 Prill 2026, 23:42
Një nga podcasterët më të njohur amerikanë të ekstremit të djathtë e ka braktisur Donald Trump-in, duke e cilësuar “të mbaruar” për shkak të përkeqësimit të rënies mendore, dhe ka ftuar votuesit të “presin litarin” para zgjedhjeve të mesmandatit, të planifikuara për në nëntor.
Ndërkohë, prezantuesja Megyn Kelly (mbështetëse e njohur e Trump-it) e ka akuzuar administratën amerikane se po fsheh bilancin real të ushtarëve të vrarë dhe të plagosur në luftën me Iranin. Revolta e influencerëve të galaksisë Maga është fenomeni më i fundit që shtohet në një moment negativ për presidentin, i cili po bie ndjeshëm në sondazhe.
Por goditjen e rëndë nga një prej mbështetësve më besnikë, biznesmeni nuk e priste. Alex Jones, 52 vjeç, konspiracionist i hershëm, e ka krahasuar Trump-in, 79 vjeç, me gjyshin e tij, i cili ndërroi jetë pasi vuajti nga demenca.
“Ai vdiq mendërisht një vit para se të vdiste fizikisht”, shtoi Jones, duke iu referuar gjyshit. Gjatë programit të tij “The Alex Jones Show”, podcasteri e ka cilësuar Trump-in në “rënie të lirë” dhe ka ftuar kandidatët republikanë të distancohen nga presidenti para zgjedhjeve për Kongresin.
“Kur kyçet e këmbëve fryhen deri në trefishin e madhësisë origjinale, kjo do të thotë pamjaftueshmëri kardiake. Dhe ai duket vërtet i sëmurë. Belbëzon dhe, e dini, duket sikur truri nuk funksionon mirë”, shtoi ai.
“Prandaj ne thjesht e presim litarin me Trump-in dhe mobilizohemi kundër demokratëve”.
“Nuk është më njeriu që ishte vitin e kaluar, duhet të jemi të trishtuar, jo, kjo nuk është për të qeshur, nuk është mirë, por ai tashmë ka ikur”. “Të gjithë ata që e rrethojnë, si Pete Hegseth (shefi i Pentagonit) janë në panik. Shihet që zëdhënësja është në panik, por janë besnikë dhe mendojnë se në fund është e keqja më e vogël, por unë them se duhet ndërhyrë dhe duhet bërë që Trump të marrë një pushim”, tha ai.
Jones përmendi edhe sondazhin e Universitetit të Massachusetts sipas të cilit popullariteti i Trump-it ka rënë në 33 për qind.
“Këto janë shifra reale, e shoh në rrugë. Gjashtë muaj më parë ishte në 56 për qind, më popullori ndonjëherë”. Ndërhyrja e Jones pason atë të Joe Rogan, një tjetër podcaster i djathtë, i cili javët e fundit e ka cilësuar “të çmendur” konfliktin me Iranin.
“Njerëzit ndihen të tradhtuar”, shtoi ai. Ndërkohë Andrew Schulz, prezantues i podcastit Flagrant, një tjetër zë i bazës trumpiane, ka kritikuar presidentin për lejimin e agjentëve të emigracionit të mbulonin fytyrën me maska.
Për ta plotësuar panoramën është edhe aktakuza ndaj Trump e hedhur nga një prej besnikëve të tij, ish-prezantuesja e Fox News, Megyn Kelly, e cila e ka akuzuar presidentin për fshehjen e bilancit të vërtetë të viktimave të luftës me Iranin.
Numri zyrtar është 13 ushtarë të vrarë dhe të paktën 12 të plagosur rëndë në sulmin e 27 marsit ndaj bazës ajrore Prince Sultan, në Arabinë Saudite.
Në total, të plagosurit që nga fillimi i luftës janë treqind. Por Kelly nuk e beson.
“Presidenti Trump gjithmonë thotë se jemi përpara afatit, si për sallën e ballove të Shtëpisë së Bardhë, por këtu flasim për ushtarë amerikanë që po vdesin”.
“Kemi trembëdhjetë burra e gra të vrarë dhe njëzet e pesë të plagosur rëndë. Por çfarë do të thotë kjo? Kanë humbur gjymtyrët? Janë plagosur në kokë? Nuk na i thonë. Këto informacione janë censuruar në masë të madhe”.
“As nuk mendojmë se e dimë numrin e vërtetë të të vdekurve, dhe nuk e dimë si janë rrëzuar të gjitha këto avionë”, vazhdoi ajo.
Kelly nuk ka dhënë prova për hipotezën e saj, por prej javësh administrata Trump akuzohet se nuk ka dhënë informacion në mënyrë transparente. Vetë shefi i Pentagonit, Hegseth, kishte qortuar mediat amerikane për raportimin e vdekjes së ushtarëve, duke thënë se duhej të përqendroheshin në festimin e sukseseve ushtarake. /La Republica/
