Pak ditë para nisjes së vitit të ri shkollor, Drejtori i Përgjithshëm i Policisë së Shtetit, Skënder Hita, zhvilloi nj...
BOTA
Influenceri filmon veten duke ngrënë kotoleta pule në një tren ekstrem me shpejtësi 150 km/h
PiranjatPërditësimi i fundit 9 Qershor 2026, 11:55
Një influencer në YouTube ka publikuar një video ku shihet duke shkelur një rregull të rreptë sigurie në një park argëtues, pasi futi fshehurazi një kuti me kotoletta pule në një tren ekstrem 94 metra të lartë, i cili arrin shpejtësi deri në 150 km/h.
Javën e kaluar, Allen Ferrell, i njohur për përmbajtjen e tij humoristike në rrjetet sociale, publikoi një video ku vendos një kuti me 10 kotoletta pule në pantallona dhe më pas hipën në atraksionin Millennium Force në parkun argëtues Cedar Point, në Ohio.
Më vonë në video, Ferrell shihet duke nxjerrë kutinë dhe duke ngrënë kotolettat e pulës ndërsa treni ekstrem zbret me shpejtësi nga një prej pjerrësive të tij. Ai përpiqet gjithashtu të konsumojë një paketë salce gjatë udhëtimit, por ajo i rrëshqet nga fytyra.
“Sendet e palidhura nuk lejohen në Millennium Force”, deklaroi Tony Clark, përfaqësues i parkut argëtues, për revistën Entertainment Weekly. Ai theksoi gjithashtu se parku nuk e miraton sjelljen e treguar në video.
Sipas rregullave të sigurisë së Cedar Point, në shumicën e atraksioneve sendet personale duhet të ruhen në xhepa të sigurt, çanta mesi, dollapë ose t’u lihen personave që nuk hipin në lojë. Në Millennium Force, çdo send që nuk mund të ruhet në mënyrë të sigurt ndalohet të merret me vete dhe duhet të lihet në dollapë ose jashtë radhës së pritjes.
Në një tjetër tren ekstrem të parkut, Steel Vengeance, vizitorët kalojnë fillimisht nëpër detektor metali për t’u siguruar se nuk mbajnë sende të lira me vete.
Incidentet me sende të lira në trenat ekstremë kanë shkaktuar lëndime edhe në parqe të tjera në botë. Në korrik të vitit 2025, një vizitor mori me vete telefonin celular në atraksionin Phantom's Revenge në Pittsburgh. Pajisja fluturoi gjatë lëvizjes dhe goditi një tjetër pasagjer, i cili përfundoi në spital.
Shumë parqe argëtuese në botë zbatojnë rregulla të ngjashme. Kompleksi Universal Orlando Resort dhe Walt Disney World Resort ofrojnë dollapë për ruajtjen e sendeve personale përpara hyrjes në atraksione si VelociCoaster dhe Tron Lightcycle Run.
Cedar Point konsiderohet një nga destinacionet më të mëdha të trenave ekstremë në botë, me 18 atraksione të tilla në funksion. Atraksioni i tij Top Thrill 2 mbajti deri vonë rekordin si treni ekstrem më i lartë në botë me 128 metra, derisa u tejkalua nga Falcons Flight në Arabinë Saudite, e cila arrin lartësinë 195 metra./Përktheu Piranjat News
