Drejtori i Përgjithshëm i Policisë së Shtetit, Skënder Hita ka mbërritur në Drejtorinë e Policisë së Kor&cce...
BOTA
Inxhinieri i Google fitoi 1.2 milionë dollarë nga bastet duke përdorur informacione konfidenciale
PiranjatPërditësimi i fundit 29 Maj 2026, 11:47
Një inxhinier softuerësh i Google u akuzua të mërkurën se përdori informacione konfidenciale të kompanisë për të fituar mbi 1.2 milionë dollarë nga bastet online, në një nga rastet më të rëndësishme penale të lidhura me tregjet e parashikimeve.
Michele Spagnulo, 36 vjeç, shtetas italian që jeton në Zvicër, përballet me akuza për mashtrim financiar, mashtrim elektronik dhe pastrim parash, sipas një padie federale të publikuar në Nju Jork.
Prokurorët pretendojnë se Spagnulo vendosi një seri bastesh nga tetori deri në dhjetor duke përdorur të dhëna të brendshme të Google mbi kërkimet e përdoruesve.
“Ndryshe nga personat e tjerë në treg, Spagnulo e dinte rezultatin e këtyre basteve para publikut, sepse kishte akses në të dhëna konfidenciale dhe me vlerë tregtare të Google,” thuhet në padi.
Spagnulo nuk iu përgjigj menjëherë kërkesave për koment.
Sipas dokumenteve gjyqësore, ai përdorte emrin “AlphaRacoon” dhe fitoi mbi 1.2 milionë dollarë pasi parashikoi saktë se këngëtari D4vd do të ishte personi më i kërkuar në Google gjatë vitit 2025.
Kur ai vendosi bastin për D4vd, tregu i parashikimeve i jepte pothuajse zero mundësi që këngëtari të renditej i pari në kërkimet e Google, shkruajnë prokurorët.
Pas fitimit, Spagnulo dyshohet se ndërmori hapa për të fshehur origjinën e parave dhe përdorimin e informacionit jo publik.
Një zëdhënës i Google deklaroi se kompania po bashkëpunon me autoritetet.
“Punonjësi kishte akses në materialet tona përmes një mjeti të disponueshëm për të gjithë stafin, por përdorimi i informacionit konfidencial për baste është një shkelje serioze e politikave tona,” tha kompania, duke shtuar se punonjësi është pezulluar nga detyra.
Edhe platforma e basteve deklaroi se po bashkëpunon me hetimet dhe theksoi se është platforma e parë e parashikimeve që ka ndihmuar autoritetet amerikane në ngritjen e akuzave për përdorim të informacionit të brendshëm.
Ky është rasti i dytë i madh penal këtë vit që lidhet me tregjet e parashikimeve. Në prill, autoritetet amerikane arrestuan një ushtar të forcave speciale amerikane, i akuzuar se përdori informacione sekrete për të vendosur baste mbi zhvillime politike në Venezuelë.
Prokurori amerikan Jay Clayton deklaroi se “lakmia që qëndron pas përdorimit të informacionit të brendshëm dëmton integritetin e tregjeve” dhe shtoi se personat që përdorin informacione konfidenciale për përfitime financiare do të ndiqen penalisht./Përktheu Piranjat News
