Në 20 ditë protestë përpara Kryeministrisë, Edi Rama ka dalë disa herë për t’iu përgjigjur protestuesve. He...
BOTA
Irani: Zgjatja e armëpushimit mashtrim, SHBA po planifikon sulme
PiranjatPërditësimi i fundit 22 Prill 2026, 13:59
Irani e cilëson pa asnjë vlerë shtyrjen pa afat të armëpushimit që presidenti amerikan Donald Trump njoftoi të martën, siç deklaroi Mahdi Mohammadi, këshilltar i kreut të parlamentit iranian.
“Shtyrja e armëpushimit nga Trump është një mashtrim për të blerë kohë. Vazhdimi i rrethimit detar është agresion ushtarak dhe do të marrë përgjigje”, tha ai.
Donald Trump deklaroi se e shtyu sulmin me kërkesë të Pakistanit, për t’u dhënë kohë negociatave për një propozim të unifikuar.
Megjithatë, përmes rrjetit “Truth”, ai theksoi se bllokada detare nuk do të hiqet.
Sipas Trump-it, Irani po falimenton dhe po humbet 500 milionë dollarë në ditë, duke bërë që ushtria dhe policia të mbeten pa paga. Sipas shefit të Shtëpisë së Bardhë, nëse hiqet bllokada amerikane, ata nuk do të pranojnë një marrëveshje.
Teherani ka paralajmëruar se është gati të vijojë rezistencën, ndërsa zyrtarët thonë se do të ulen menjëherë në bisedime nëse amerikanët heqin bllokadën.
Pavarësisht armëpushimit, Garda Revolucionare Islamike ka vijuar operacionet në Ngushticën e Hormuzit. Forcat iraniane goditën me armë zjarri dy anije tregtare, mes të cilave edhe një anije greke, që tentuan të thyenin bllokadën e tyre.
Agjencia detare britanike raportoi se nuk pati të lënduar, por anijet pësuan dëmtime të rëndësishme në kuvertë.
Britania e Madhe ka nisur organizimin e një stafi ushtarak nga 30 vende të ndryshme për t’i dërguar në rajon. Qëllimi i këtij misioni është nisja e operacioneve të pastrimit në Ngushticën e Hormuzit sapo të ndalen luftimet.
Ky koordinim ndërkombëtar synon të garantojë lirinë e lundrimit dhe sigurinë e tregtisë globale të naftës.
