Dashi
E diela fillon pak e përgjumur, por më pas forca dhe energjia kthehen pasdite. Mbrëmja do të jetë shumë e vlefshme për...
BOTA
Ja pse Inteligjenca Artificiale po rrit faturat e energjisë
PiranjatPërditësimi i fundit 27 Prill 2026, 13:04
Ndërsa jashtë mbizotëron moti me diell, brenda një shtëpie 3,000 metra katrorë në Atlanta mbizotëron i ftohti. Banorja Carolyn Kayne thotë se është detyruar të fikë ngrohjen dhe ujin për shkak të rritjes së ndjeshme të faturave të energjisë elektrike, të cilat pothuajse janë dyfishuar në dy vitet e fundit. “Endem nëpër shtëpi me rroba skish për të qëndruar ngrohtë,” është shprehur ajo për mediat, duke shtuar se tashmë jeton vetëm në një pjesë të vogël të banesës së saj.
Sipas Patty Durand, themeluese e organizatës “Georgians for Affordable Energy”, rritja e kostove të energjisë është një problem i përhapur në të gjithë shtetin. Ajo thekson se fatura mesatare mujore është rritur nga rreth 150 dollarë në 225 dollarë. Një analizë e fundit tregon se kompania kryesore energjetike në shtet, Georgia Power, ka aplikuar gjashtë rritje tarifash gjatë tre viteve të fundit. Kjo periudhë përkon me hyrjen në funksion të centralit bërthamor Vogtle dhe rritjen e numrit të qendrave të të dhënave, të cilat janë të lidhura me kërkesën në rritje për inteligjencë artificiale.
Ekspertët paralajmërojnë se zgjerimi i këtyre qendrave po ndikon drejtpërdrejt në rritjen e kostove të energjisë për konsumatorët. Sipas një analize të vitit 2025, banorët që jetojnë pranë qendrave të të dhënave mund të paguajnë deri në 267% më shumë për energji krahasuar me pesë vite më parë. Ndërkohë, në shtetin Maine, guvernatorja Janet Mills ka bllokuar një projektligj që synonte ndalimin e ndërtimit të qendrave të reja të të dhënave, duke theksuar nevojën për studim të mëtejshëm të ndikimeve të tyre.
Nga ana tjetër, Georgia Power ka deklaruar se nuk ka rrezik që kostot e këtyre zhvillimeve t’u kalojnë konsumatorëve familjarë dhe ka njoftuar një ngrirje të përkohshme të tarifave. Megjithatë, për qytetarë si Carolyn Kayne, situata mbetet e rëndë. “Ndoshta është koha të heq dorë nga shtëpia ime,” shprehet ajo, duke reflektuar shqetësimin në rritje të shumë familjeve amerikane përballë kostove të larta të jetesës./Përktheu Piranjat News
