Kreu i grupit të PS-së, Taulant Balla, gjatë një prononcimi për gazetarët pas mbledhjes së Kuvendit ka folur për protest...
BOTA
Jeta luksoze dhe lidhjet e tij me Rusinë, kush është biznesmeni ukrainas që i bënë atentat në Monako?
PiranjatPërditësimi i fundit 30 Qershor 2026, 19:36
Një bombë artizanale, një atentator në arrati, por çfarë, dhe mbi të gjitha kush qëndron pas atentatit në Monako, që tronditi Principatën natën e djeshme, të hënën më 29 qershor?
Bëhet fjalë për goditjen ndaj Vadim Ermolaev, 58 vjeç, biznesmen ukrainas, i cili ndodhet në gjendje të rëndë së bashku me bashkëshorten e tij, ndërsa djali 13-vjeçar raportohet në gjendje më të lehtë. E përditshmja Le Figaro raportoi se pamjet e kamerave të sigurisë tregonin një person që lëshonte një çantë në hyrje të një ndërtese banimi pak para shpërthimit.
Ermolaev, i cili prej shtatë vitesh jeton në Principatë, ka grumbulluar një pasuri të madhe. Ai është aktiv në disa sektorë, duke nisur nga aktivitetet imobiliare, importi dhe prodhimi i alkoolit, kozmetikës dhe detergjentëve.
Dhjetë vite më parë quhej “mbreti i Dnipros”, pasuria e tij i afrohet një miliard eurove. Atij i përket kompania Alef, një konglomerat i madh industrial dhe imobiliar i aktivizuar në sektorët e ndërtimit, prodhimit, bujqësisë dhe tregtisë. Para shpërthimit të luftës me Rusinë, ai ka firmosur projektet kryesore të transformimit urban dhe komplekset më të rëndësishme imobiliare në Dnipro.
Mendohej se pas aneksimit të Krimesë, Ermolaev kishte humbur asetet e tij në gadishull, por më vonë u zbulua se ai kishte transferuar biznesin e alkoolit te ndërmjetës dhe kishte vazhduar aktivitetin nën autoritetet ruse. Për këtë arsye në vitin 2023 ai u sanksionua nga Ukraina.
Djali i madh i Ermolaev, Arthur, ka krijuar një rrjet call center-ash mashtruese që kanë mashtruar qytetarë të Bashkimit Europian. Në dhjetor 2025 ai u arrestua në Qipro, teksa po përgatitej të hipte në një fluturim drejt Dohas, dhe u ekstradua në Estoni, ku më pas u gjykua për krijimin e një organizate kriminale.
Sipas hetimeve, call center-at e tij kanë përvetësuar rreth 100 milionë euro nga qytetarë të disa vendeve, përfshirë 5 milionë euro nga qytetarë estonezë. Në fund, Arthur Ermolaev u detyrua t’i paguante Estonisë 8,5 milionë euro, u dënua dhe u dëbua nga vendi, ku tani e ka të ndaluar rikthimin.
