Vala e të nxehtit që ka shkaktuar 1300 viktima në mbarë Europën, ka vënë në pah nevojën urgjente që sistemet...
BOTA
Sa ujë konsumon në të vërtetë Inteligjenca Artificiale?
PiranjatPërditësimi i fundit 30 Qershor 2026, 11:53
Google thotë se një kërkesë tipike drejtuar inteligjencës artificiale konsumon rreth pesë pika ujë. Sam Altman i OpenAI përmend një sasi të ngjashme – rreth një të pesëmbëdhjetën e një luge çaji.
Por një vlerësim tjetër, që është bërë viral, pretendon se një email i shkurtër i shkruar me ndihmën e inteligjencës artificiale konsumon sa një shishe gjysmëlitërshe me ujë. Dallimi është i jashtëzakonshëm: ndërmjet këtyre tre pretendimeve të përhapura gjerësisht, vlerësimi më i madh është rreth 2.000 herë më i lartë se më i vogli.
Asnjëri prej tyre nuk është plotësisht i saktë. Arsyeja është se nuk matin të njëjtën gjë. Disa llogaritje përfshijnë vetëm ujin e përdorur për ftohjen e qendrave të të dhënave (data centers). Të tjera shtojnë edhe ujin e përdorur për prodhimin e energjisë elektrike që i furnizon ato. Ndërsa disa mbështeten në supozime të vjetruara për një teknologji që po ndryshon me ritme shumë të shpejta. Ndërsa këto shifra përhapen në blogje, rrjete sociale, pankarta protestash dhe mbledhje publike, humbet konteksti dhe nuancat.
Kjo ngre një pyetje themelore:Sa ujë përdor në të vërtetë inteligjenca artificiale?
Përgjigjja varet nga modeli i inteligjencës artificiale, vendndodhja e qendrës së të dhënave dhe burimet e energjisë elektrike që furnizojnë rrjetin lokal. Në disa raste, konsumi i ujit mund të ndryshojë me qindra herë. Për të kuptuar më mirë këto pretendime, ne shqyrtuam studimet shkencore mbi të cilat bazohen disa nga shifrat më të përhapura për etjen e AI-së për ujë.
Gjithashtu krahasuam këto vlerësime me sasinë e ujit që përdoret për produkte dhe shërbime të tjera që njerëzit konsumojnë çdo ditë, përfshirë edhe statistiken virale sipas së cilës prodhimi i një hamburgeri të vetëm kërkon më shumë ujë sesa mijëra kërkesa (prompts) drejtuar inteligjencës artificiale. Kjo rezulton të jetë e vërtetë, pavarësisht mënyrës se si bëhet llogaritja.
Në fund, megjithëse qendrat e të dhënave konsumojnë shumë ujë, të dhënat tregojnë se kërkesat më të mëdha për burimet ujore në SHBA lidhen me aktivitetet e përditshme, si prodhimi i ushqimit, ujitja e lëndinave dhe përdorimi i ujit për higjienën personale. Pesë grafikë që e vendosin në kontekst konsumin e ujit nga inteligjenca artificiale Konsumi total i ujit nga qendrat e të dhënave në SHBA dhe parashikimet për të ardhmen Studiuesit nuk mund ta matin drejtpërdrejt të gjithë konsumin e ujit nga inteligjenca artificiale, por mund të vlerësojnë sasinë e ujit të përdorur nga qendrat e të dhënave që e mbështesin atë.
Shkencëtarët e Laboratorit Kombëtar Lawrence Berkeley vlerësojnë se qendrat amerikane të të dhënave përdorën rreth 228 miliardë gallonë ujë gjatë vitit 2023.
Prej kësaj sasie: rreth 17 miliardë gallonë u përdorën për ftohjen e serverëve; ndërsa 211 miliardë gallonë lidhen me prodhimin e energjisë elektrike që i furnizonte këto qendra.
Studiuesit parashikojnë se deri në vitin 2028 kjo sasi mund të rritet në 469 deri në 844 miliardë gallonë, në varësi të teknologjisë së qendrave të të dhënave dhe burimeve të energjisë që furnizojnë rrjetin elektrik.
Megjithatë, inteligjenca artificiale përbën vetëm një pjesë të kësaj kërkese. Agjencia Ndërkombëtare e Energjisë vlerëson se AI përbën 15–20% të kërkesës për energji elektrike të qendrave të të dhënave dhe, rrjedhimisht, edhe të konsumit të tyre të ujit.
Pjesa tjetër përdoret për aktivitete të tjera dixhitale, si: të dhënat satelitore që ndihmojnë në parashikimin e motit dhe mbështesin operacionet ushtarake; transmetimi (streaming) i filmave dhe serialeve; shikimi i videove në TikTok dhe platforma të tjera nga miliarda përdorues./Përktheu Piranjat News
