Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
BOTA
Kuvendi Kombëtar Republikan në SHBA, debate për të drejtën për abort
E.DPërditësimi i fundit 21 Korrik 2024, 17:34
SHBA- Gjatë Kuvendit Kombëtar Republikan delegatët miratuan programin e partisë ku ndalimi i të drejtës për abort nuk zë një vend të rëndësishëm, një kontrast i thellë me qëndrimet e mëparshme të partisë. Korrespondenti i Zërit të Amerikës, Steve Herman, i cili ndoqi punimet e Kuvendit njofton se ky qëndrim zyrtar më i butë për të drejtat riprodhuese synon ta bëjë kandidatin e tij Donald Trump më tërheqës për votuesit e pavendosur.
Republikanët mbërritën në Kuvendin Kombëtar Republikan në Miluoki në mbështetje të ish-presidentit Trump si asnjëherë më parë, pas atentatit ndaj tij.
Por debatet mes tyre vijuan për një për një nga politikat konservatore: e drejta për abort.
Miratimi i programit të partisë në një votim me zë, pa debat, zhgënjeu shumë republikanë që mbështesin një ndalim të rreptë të abortit, ndërsa të tjerë kanë një qëndrim më pragmatik.
“Nuk duhet të jetë një vendim: gjithçka ose asgjë. Dhe ne nuk do të fitojmë zgjedhjet nëse ky është qëndrimi ynë. Pra, duhet të bëjmë pak kompromis. Do të marrë kohë”, thotë Sheila Klopp një votuese katolike, e cila pranon se ndërsa disa aktivistë republikanë kërkojnë një ndalim total të abortit, shumë politikanë republikanë duhet të moderojnë qëndrimin e tyre kundër abortit për t’u zgjedhur.
Ish-kandidati republikan për president, Vivek Ramaswamy i tha Zërit të Amerikës se ai është ‘100 për qind pro jetës’, por se një qasje më e butë është një domosdoshmëri politike.
“A duhet të mos pajtohemi me disa amerikanë që janë në anën tjetër, pro abortit? Po do ta bëjmë. Por a duhet të jetë një çështje që na çon në pikën tonë të thyerjes? Absolutisht jo”, thotë ai.
Kandidati republikan për president Donald Trump, të paktën përkohësisht ka zgjedhur të bëjë politikë dhe të lërë mënjanë retorikën e vijës së ashpër për çështjen e abortit.
“Unë mendoj se ai është miqësor me çështjen e jetës, kundër abortit dhe mendoj se ne do të jemi në gjendje të bëjmë përparim nën udhëheqjen e tij të ardhshme”, thotë Steve McKee, nga Fondacioni “Heritage”.
Tek republikanët ka një optimizëm se nëse zoti Trump merr një mandat të dytë ai mund të nënshkruajë një projekt-ligj që vendos një ndalim kombëtar të abortit.
“Duke folur vetëm për veten time, personalisht prirem të shikoj më shumë historinë sesa retorikën e fushatës. Dhe mendoj se kur kemi të bëjmë me kandidatë që kanë qenë në detyrë më parë, kemi shumë për të punuar”, thotë Noelle Huizenga, ish punonjëse në Shtëpinë e Bardhë.
Kandidati me të cilin lëvizja pro-jetës ka punuar në Shtëpinë e Bardhë gjatë kohës kur zoti Trump ishte president nuk do të jetë më, pavarësisht se çfarë do të ndodhë në nëntor. Si nënpresident, Mike Pence trumpetonte vazhdimisht mesazhin kundër abortit.
Ndërsa kandidati për nënpresident i zotit Trumpit këtë vit, J.D. Vance, kundërshtoi amendamentin e të drejtave të abortit të shtetit të tij vitin e kaluar, por ka të ngjarë që ai të mos sjellë në Shtëpinë e Bardhë të njëjtin pasion ndaj kauzës, si zoti Pence./VOA
