Një nënë nga Korça, Volsjana Plasa, denoncon se djali i saj 4-vjeçar është dhunuar nga edukatorja në kopshtin nr. ...
AKTUALITET
Tragjedia në Tale, plazhi pa vrojtues
PiranjatPërditësimi i fundit 19 Qershor 2026, 18:00
Ngjarja tragjike e regjistruar paraditen e së premtes në bregdetin e Tales, ku humbën jetën dy vajza të mitura të moshës 9 dhe 11 vjeç, ka ngritur pikëpyetje serioze mbi sigurinë në plazhet publike dhe mungesën e masave mbrojtëse gjatë sezonit turistik.
Sipas informacioneve paraprake, në segmentin e plazhit ku ndodhi ngjarja nuk ka pasur vrojtues plazhi në detyrë, ndonëse zona frekuentohet nga pushues të shumtë gjatë muajve të verës.
Viktimat janë identifikuar si J. Dajlani, 9 vjeçe, dhe A. Misha, 11 vjeçe. Dy të miturat u nxorën nga deti pa shenja jete, ndërsa trupat e tyre u transportuan në morgun e Spitalit Rajonal të Lezhës.
Policia bëri të ditur se në bashkëpunim me pushuesit e pranishëm në zonë u bë e mundur gjetja dhe nxjerrja e trupave në breg, por për fat të keq pa mundur t’u shpëtohej jeta.
Kjo tragjedi ka rikthyer në qendër të vëmendjes debatin mbi mungesën e rojeve bregdetare dhe standardet e sigurisë në plazhet publike. Vetëm dy javë më parë, bregdeti i Shëngjinit u përball me një tjetër ngjarje të rëndë, ku humbën jetën tre persona.
Autoritetet kanë nisur hetimet për të zbardhur plotësisht rrethanat e ngjarjes, ndërsa familjarët dhe komuniteti lokal janë tronditur nga humbja e dy vajzave të mitura.
