Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
Mblidhet sot Konklava, 133 kardinalë nga e gjithë bota votojnë për Papën e ri, do të ndërpritet komunikimi telefonik në Vatikan
n.fPërditësimi i fundit 7 Maj 2025, 08:17
VATIKAN- Vatikani njoftoi se do të ndërpresë të gjitha komunikimet telefonike brenda qytetit-shtet të vogël gjatë konklavës për të zgjedhur një papë të ri, duke sqaruar se Sheshi i Shën Pjetrit nuk do të preket. Konkretisht, sinjali i të gjithë ofruesve të telefonisë celulare brenda territorit të Vatikanit do të çaktivizohet sot nga ora 15:00. Komunikimi telefonik do të rikthehet pas shpalljes së zgjedhjes së papës së ri.
Zëdhënësi i Vatikanit, Matteo Bruni, sqaroi për gazetarët se ndërprerja e komunikimeve telefonike nuk do të prekte Sheshin e Shën Pjetrit. Mijëra besimtarë pritet të mblidhen në sheshin përpara Bazilikës së Shën Pjetrit, duke pritur shpalljen e pasardhësit të Papa Françeskut, i cili vdiq më 21 prill.
Në total, 133 kardinalë nga e gjithë bota do të thirren të votojnë për papën e ardhshëm, udhëheqësin shpirtëror të 1.4 miliardë të katolikëve në të gjithë botën. Zgjedhjet po zhvillohen në fshehtësi të plotë dhe kardinalët duhet të dorëzojnë telefonat e tyre celularë kur të hyjnë në konklavë.
Votimi i parë pritet tre orë pas fillimit të Konklavit. Sipas ritualit, nga oxhaku i Kapelës Sistine del tym i bardhë nësë zgjidhet Papa i ri në të kundërt del tym i zi. Askush nuk e di se cili nga kardinalët është favoriti për t'u bërë Papa i ardhshëm dhe as sa do të zgjasë mbledhja e Kolegjit të Kardinalëve.
Qëllimi i krahut konservator është të zgjedhë një Papë i cili do të përqendrohet më shumë në çështje që kanë të bëjnë më shumë me besimin katolik, thelbin e tij, dhe më pak në problemet e përditshme me të cilat u përball Papa Françesku, në një shkallë që i shqetësoi disa, siç janë ndryshimet klimatike dhe imigracioni.
Nga ana tjetër, krahu progresiv dëshiron të zgjedhë një Papë që do të vazhdojë në gjurmët e Françeskut dhe ndoshta do të shkojë edhe më tej. Edhe pse Konklava aktuale përbëhet nga kardinalë të emëruar kryesisht nga Françesku, kriteri i saj nuk ishte të ndikonte në zgjedhje në ndonjë drejtim specifik, por ta bënte trupin përfaqësues, pasi shumica e kopesë katolike është jashtë Evropës.
