Nga Mevlan Shanaj:
REQUIEM PËR NJË BESIM
Edi Rama,
Sot po të shkruaj jo si kundërshtar politik, por si një njeri që t&eum...
BOTA
Me rrëke lotësh/ Shtëpia e Bardhë manipulon fotot e aktivistes të arrestuar, plasin polemikat
PiranjatPërditësimi i fundit 23 Janar 2026, 18:52
Administrata Trump akuzohet sërish për sjellje të pandershme dhe propagandë politike, pasi Shtëpia e Bardhë publikoi në rrjetet sociale një foto të manipuluar të Nekima Levy Armstrong, një avokate dhe aktiviste e njohur afro-amerikane, e arrestuar në Minnesota nga autoritetet federale.
Nekima Levy Armstrong nuk është një emër i panjohur: ajo ka qenë drejtoreshë e degës lokale të NAACP (Shoqata Kombëtare për Përparimin e Njerëzve me Ngjyrë), organizatë historike për të drejtat civile e themeluar në vitin 1909. Ajo u arrestua të enjten me akuzën se kishte organizuar dhe udhëhequr një protestë kundër pastorit David Easterwood, një klerik i bardhë që ka marrë përkohësisht drejtimin e zyrës lokale të ICE (Immigration and Customs Enforcement), policia amerikane kundër emigrantëve.
Protestë në kishë kundër hipokrizisë
Ngjarja ndodhi të dielën e kaluar, kur Armstrong dhe rreth 50 protestues ndërprenë meshën që Easterwood po mbante në kishën Cities Church në St. Paul, Minnesota. Protestuesit e akuzuan pastorin për hipokrizi: sipas tyre, nuk mund të predikosh Ungjillin dhe njëkohësisht të justifikosh arrestimin dhe deportimin e emigrantëve. Prokurorja e Përgjithshme Pam Bondi, duke njoftuar arrestimin, deklaroi se “Jezusi nuk do ta kishte ndërprerë kurrë një meshë apo shërbesë fetare”. Një deklaratë që shumë e kritikuan, duke kujtuar episodin biblik, kur Jezusi përzë tregtarët nga Tempulli.
Dy foto, një e vërtetë dhe një e manipuluar
Pak pas arrestimit, Sekretarja e Sigurisë Kombëtare, Kristi Noem, publikoi një foto të Armstrong në momentin e ndalimit: e veshur me të zeza, serioze dhe e qetë, ndërsa një agjent e mbante për krahu. Fotoja dukej neutrale dhe faktike. Por rreth 30 minuta më vonë, Shtëpia e Bardhë publikoi të njëjtën foto të ndryshuar. Në versionin e ri, fytyra e Armstrong dukej sikur ishte mbushur me lot, me shprehje të shtrembëruar nga dhimbja dhe me ngjyrë lëkure dukshëm më të errët. Fotografia e manipuluar u shpërnda edhe nga zëdhënësja e Shtëpisë së Bardhë, Karoline Leavitt.
Sipas shumë kritikëve, ky ndryshim nuk ishte rastësor: errësimi i lëkurës dhe paraqitja e saj si e dobët dhe emocionale shihen si një përpjekje për ta demonizuar dhe kriminalizuar figurën e saj në sytë e publikut, duke shfrytëzuar stereotipe raciste.
‘Guardian’ zbulon manipulimin
Ishte gazeta britanike ‘The Guardian’ që vuri re mashtrimin, duke krahasuar dy imazhet. Gazeta provoi se nuk bëhej fjalë për dy momente të ndryshme, por për të njëjtën foto të modifikuar dixhitalisht: pozicioni i agjentëve, njerëzit në sfond dhe krahu i policit pas shpinës së Armstrong ishin identikë në të dyja pamjet.
“Edhe memet do të vazhdojnë”
Kur Guardian kërkoi shpjegime, Kaelan Dorr, zëvendësdrejtor i komunikimit në Shtëpinë e Bardhë, reagoi me arrogancë në platformën X (ish-Twitter): “Për ata që ndjejnë nevojën të mbrojnë autorë krimesh të rënda: zbatimi i ligjit do të vazhdojë. Dhe po, edhe memet do të vazhdojnë.”
Ky reagim vetëm sa i përforcoi akuzat se administrata Trump po përdor manipulim vizual dhe inteligjencën artificiale si mjet propagande. Llogaria zyrtare e Shtëpisë së Bardhë në X, me rreth 3.5 milionë ndjekës, ka publikuar të paktën 14 postime të krijuara ose të ndryshuara me AI që nga fillimi i mandatit të dytë të Trump.
Strategji e rrezikshme
Për kritikët, ky rast tregon qartë se lojërat e pista janë kthyer në strategji politike: shtrembërimi i realitetit, përdorimi i racizmit të nënkuptuar dhe banalizimi i arrestimeve përmes “memeve” përbëjnë një rrezik serioz për demokracinë dhe besimin publik.
Në një kohë tensionesh të mëdha sociale dhe racore në SHBA, manipulimi i imazheve zyrtare nga vetë Shtëpia e Bardhë shihet nga shumë persona si një kalim i vijës së kuqe.
