Policia e Shtetit ka nxjerrë një shkresë urgjente drejtuar komisariateve të Tiranës, ku kërkon marrjen e një sërë...
BOTA
Meksikë/ Vritet El Mencho, i kërkuari numër një i narkotikëve! Për të ishte vendosur një shpërblim prej 15 milionë dollarësh
PiranjatPërditësimi i fundit 22 Shkurt 2026, 20:03
Forcat e sigurisë së Meksikës njoftuan vrasjen e Nemesio Oseguera Cervantes, i njohur si «El Mencho», themelues dhe lider i Kartelit Jalisco Nueva Generación (CJNG), banda kriminale më e frikshme në vend. Lajmi u konfirmua pas orësh tensioni në shtetin e Jalisco, të shkaktuara nga nisja e operacioneve të ushtrisë. El Mencho akuzohet nga Departamenti i Drejtësisë i SHBA-së dhe nga Departamenti i Drejtësisë i Meksikës për krime të lidhura me narkotikët dhe kriminalitetin e organizuar.
I lindur në vitin 1966, Oseguera Cervantes ishte futur nga administrata amerikane në listën e kriminelëve më të kërkuar, duke ofruar një shpërblim milionësh për informacion të dobishëm për arrestimin e tij. Drug Enforcement Administration (DEA) e përshkruan CJNG-në si një nga organizatat kriminale më të fuqishme në Meksikë. Raporte publike të agjencisë tregojnë se grupi ka përdorur taktika ushtarake, armë me kalibër të lartë dhe strategji propagandistike për të rritur dhe konsoliduar pushtetin e tij. Për kapjen e tij ishte vendosur një shpërblim prej 15 milionë dollarësh.
Brian McKnight, drejtues i DEA-së amerikane, e kishte quajtur Cervantes «armikun publik numër një», në gjendje të kontrollojë 80% të drogës që arrin në një qytet si Chicago dhe një të tretën e të gjithë importit të drogës në Shtetet e Bashkuara (kokainë, metamfetaminë, fentanil). El Mencho është një vrasës mizor dhe miliarder, që sipas McKnight, është në krye të kartelit meksikan, i shkëputur nga grupi i Sinaloas i El Chapo, ka vendosur rrugë trafikimi droge në gjashtë kontinente dhe tani ka një bazë të fortë në Chicago, sipas hetuesve të DEA-së.
Pak detaje janë bërë të ditura deri tani mbi vrasjen e këtij krimineli të rrezikshëm: ai thuhet se u ndalua në komunën e Talpa de Allende, një zonë historikisht e identifikuar si bazë e kartelit të Jalisco-s. Pas operacionit janë raportuar bllokime rrugore në të paktën gjashtë shtete të Meksikës: Jalisco, Michoacán, Colima, Tamaulipas, Guanajuato dhe Aguascalientes, duke shkaktuar një mobilizim masiv të autoriteteve federale dhe shtetërore, një taktikë e zakonshme e përdorur nga organizatat kriminale si reagim ndaj arrestimeve ose vrasjeve të personave me profil të lartë./ Piranjat.news
