Pas pushimeve verore, deputetët rikthehen nesër në Kuvend, me nisjen e sesionit të ri parlamentar.
Seanca e parë plenare e sesionit ...
BOTA
Në gjurmët e lirisë: Historiani përkujton 250-vjetorin e Amerikës me një udhëtim simbolik
PiranjatPërditësimi i fundit 29 Qershor 2026, 11:23
Ndërsa Shtetet e Bashkuara shënojnë 250-vjetorin e themelimit të vendit, një historian ka nisur një udhëtim prej 750 miljesh për t'u kujtuar amerikanëve rrugën që ka përshkuar historia e tyre.
Anthony Cohen, 62 vjeç, nuk është i pari që ndjek këtë itinerar. Ai po ecën përgjatë një rruge që dikur ishte pjesë e "Underground Railroad", rrjetit sekret që ndihmoi mijëra skllevër të arratisur të largoheshin nga robëria dhe të gjenin lirinë në Kanada.
Cohen, historian me profesion, e përshkoi për herë të parë këtë rrugë në vitin 1996, nga shteti i tij, Maryland, deri në Ontario të Kanadasë. Më pas ai themeloi Menare Foundation, një organizatë që krijon përvoja edukative për të sjellë në jetë historinë e këtij rrjeti të fshehtë.
Me rastin e 250-vjetorit të SHBA-së, ai vendosi ta rikthente këtë udhëtim simbolik në qendër të vëmendjes. Këtë herë zgjodhi një itinerar tjetër, nga Sandy Spring në Maryland drejt Torontos, të cilin e quajti "Freedom Walk" (Ecja për Lirinë). Për të përcaktuar rrugën, ai u mbështet në harta historike dhe dëshmi të kohës.
Udhëtimi ka kaluar nëpër Delaware, New Jersey dhe New York. Pjesën më të madhe të rrugës Cohen e ka bërë në këmbë, ndërsa në disa segmente ka përdorur mjete të tjera transporti, përfshirë një tren që ndjek nga afër itinerarin historik.
"Çdo lëvizje për liri fillon duke hedhur një hap përpara dhe duke vazhduar rrugën," tha Cohen.
Ai nuk është vetëm në këtë nismë. Fondacioni Menare ka publikuar ndalesat e udhëtimit, duke u dhënë mundësi njerëzve të njihen me historinë dhe të ecin së bashku me të. Gjatë ecjes i shoqëron edhe statuja "Harriet Tubman Journey to Freedom", në nder të një prej figurave më të njohura të luftës kundër skllavërisë.
Cohen ftoi gjithashtu Tom DeWolf, pasardhës i familjes që dikur ishte ndër tregtarët më të mëdhenj të skllevërve në SHBA, t'i bashkohej udhëtimit. "Në fillim i thashë: 'Por unë jam një burrë i bardhë'. Ai m'u përgjigj: 'Edhe njerëzit e bardhë ndihmuan. Ti mund të shkruash një trashëgimi të re për familjen tënde'," tregoi DeWolf.
Në ndalesat e ndryshme, Cohen dhe DeWolf flasin për historinë e tregtisë së skllevërve, rrjetin Underground Railroad dhe rëndësinë e këtij udhëtimi simbolik.
Cohen pritet të hyjë në Kanada më 1 korrik dhe të mbërrijë në Toronto më 4 korrik, pikërisht në kohë për shënimin e 250-vjetorit të Shteteve të Bashkuara./Përktheu Piranjat News
