Një nënë nga Korça, Volsjana Plasa, denoncon se djali i saj 4-vjeçar është dhunuar nga edukatorja në kopshtin nr. ...
BOTA
Në kërkim nga policia, 40-vjeçari sulmohet nga aligatori, por arrestohet pas ndjekjes së gjatë
PiranjatPërditësimi i fundit 10 Qershor 2026, 10:46
Një burrë i kërkuar nga policia nën dyshimin për drejtim të rrezikshëm të automjetit u sulmua nga një aligator, por vazhdoi të arratisej para se të arrestohej përfundimisht, thanë autoritetet e Luizianës të hënën.
Victor Rivas, 40 vjeç, pësoi lëndime në krahë dhe u trajtua në spital përpara se të dërgohej në burg. Ai akuzohet për drejtim mjeti në gjendje të dehur, kundërshtim të arrestimit dhe arratisje nga autoritetet e famullisë fqinje të Jeffersonit, sipas Policisë Shtetërore të Luizianës.
Sipas autoriteteve, ndaj tij ishin lëshuar gjithashtu urdhër-arreste për aksident me largim nga vendngjarja dhe drejtim të pakujdesshëm të automjetit, akuza që lidhen me zonën ku nisi ndjekja policore.
Rivas, banor i Montz-it në famullinë St. Charles, po mbahet në Qendrën Korrektuese Nelson Coleman në Killona. Garancia e tij është caktuar në 17,500 dollarë.
Ngjarja ndodhi të dielën, kur policia mori njoftime për një automjet që po lëvizte në mënyrë të rrezikshme në autostradën Interstate 10, në perëndim të Nju Orlinsit.
Automjeti, një Toyota Supra, u përplas me një barrierë betoni dhe pësoi dëmtim të gomës. Më pas policia e lokalizoi në famullinë fqinje St. Charles dhe e ndaloi për kontroll. Sipas policisë, drejtuesi i mjetit shfaqte shenja dehjeje dhe u largua me vrap ndërsa efektivët po përgatiteshin ta arrestonin.
Rivas u hodh nga një segment i ngritur i autostradës Interstate 310 dhe përfundoi në një zonë moçalore poshtë saj. Më vonë ai u gjet duke ecur përgjatë autostradës 61, por u fut sërish në moçal për t’iu shmangur policisë. Këtë herë, sipas autoriteteve, ai u sulmua nga një aligator.
Megjithëse kishte pësuar lëndime në krahë, ai vazhdoi arratisjen. Në fund u lokalizua dhe u arrestua me ndihmën e teknologjisë së dronëve. Policia tha se ngjarja shërben si një kujtesë se drejtimi i mjetit nën ndikimin e alkoolit mund të sjellë pasoja serioze dhe të paparashikueshme./Përktheu Piranjat News
