Ditën e mërkurë vendi ynë do të jetë nën ndikimin e masave ajrore të paqëndrueshme.
Moti parashikohet me vran&eu...
BOTA
Një në shtatë shpikje në Gjermani realizohet nga emigrantët
PiranjatPërditësimi i fundit 14 Tetor 2025, 08:47
Sipas Institutit të Ekonomisë Gjermane (IW), një numër gjithnjë e në rritje i patentave në Gjermani vijnë nga njerëz me rrënjë të huaja. Në vitin 2022, afërsisht një në shtatë aplikime për patentë u paraqitën prej tyre (14%), raportuan studiuesit të hënën (13.10).
Në vitin 2000, ishte vetëm një në njëzet (4.9%). Prandaj, emigrantët janë “gjithnjë e më të rëndësishëm” për ekonominë gjermane, shpjegoi IW.
Evropa Lindore dhe Jugore kryesojnë
Për studimin, IW i grupoi emrat e të gjithë shpikësve që nga viti 2000 në njërën nga 24 zonat gjuhësore. Në këtë mënyrë, “rajoni i origjinës së individit në fjalë mund të përcaktohet me gjasa të mëdha”.
Sipas studimit, shpikësit nga Evropa Lindore dhe Juglindore kontribuojnë më shumë në regjistrimet e patentave në Gjermani, me një pjesëmarrje prej gati 3%. Në vendin e dytë janë zonat gjuhësore të Evropës Jugore dhe Amerikës Latine.
Në vendin e tretë është hapësira arabe, përfshirë Turqinë, me rreth 2%. Pjesëmarrja e saj është katërfishuar që nga viti 2000. Rritja është veçanërisht e fortë midis njerëzve me origjinë indiane: që nga fillimi i mijëvjeçarit, regjistrimet e patentave prej tyre janë rritur dymbëdhjetëfish, duke arritur aktualisht në 1.2%.
“Nevojiten procedura të shpejta dhe jo burokratike”
“Sukseset në Indi tregojnë si duhet vepruar, edhe në vende të tjera me një nivel të lartë arsimimi dhe një shoqëri të re, që, në koordinim me vendin përkatës të origjinës, të tërhiqen gjithnjë e më shumë studiues dhe profesionistë të kualifikuar”, thuhet në studim. Megjithatë, vetëm përpjekjet për rekrutim dhe informim nuk janë të mjaftueshme.
Ashtu si vendet e tjera të industrializuara, Gjermania mbështetet në imigrimin e njerëzve të arsimuar mirë. “Për të qenë në gjendje të konkurrosh për trurin më të mirë, nevojiten procedura të shpejta dhe jo burokratike për hyrjen në Gjermani dhe njohjen e kualifikimeve”, deklaroi studiuesja e IW, Alexandra Köbler.
Një frymë e hapur është gjithashtu thelbësore për të tërhequr ekspertë me njohuritë e tyre dhe për të mbetur tërheqëse për talentet e huaja, theksoi ajo. Në përgjithësi, Gjermania është vendi i dytë në botë për sa i përket numrit të patentave të regjistruara, pas vetëm Shteteve të Bashkuara. Në total, studiuesit në Republikën Federale regjistruan rreth 25.000 patenta vitin e kaluar.
Përqindje më e lartë e shpikëseve femra midis emigrantëve
Përqindja e shpikëseve femra midis emigrantëve, me pothuajse 9%, është pothuajse dyfishi i asaj të gjermanëve. Konkretisht, kjo përqindje është më e lartë në të gjitha zonat e tjera gjuhësore sesa në hapësirën gjermanishtfolëse, veçanërisht në zonat gjuhësore të Evropës Lindore, si çekishtja (13.6%), polonishtja (13.2%) dhe rumanishtja (12.7%), por edhe në koreanisht dhe spanjisht-portugalisht (11.1 secila), sipas IW.
“Këto rezultate mbështesin tezën e paradoksit të barazisë gjinore, domethënë vëzhgimin empirik se gratë në vendet me nivele të larta mirëqënieje dhe barazi të lartë të të drejtave u shmangen karrierave dhe profesioneve teknike dhe shkencore”, thuhet në studim.
Gratë në vendet me nivele më të ulëta mirëqënieje ose më pak barazi shfrytëzojnë studimet MINT për të “arritur një punë të paguar mirë, pavarësi dhe prosperitet”.
MINT do të thotë matematikë, shkencë kompjuterike, shkenca natyrore dhe teknologji. Kjo fushë në përgjithësi gjeneron një numër veçanërisht të lartë patentash.
Shkurt, sipas IW, përqindja e shpikëseve femra në numrin e përgjithshëm të patentave të regjistruara në Gjermani është rritur ndjeshëm, nga 3.7% në vitin 2000 në 6.0% sot, dhe migrimi po kontribuon në një sektor inovacioni gjithnjë e më të dominuar nga femrat në Gjermani./DW
