Ndërsa sulmuesi i Ekuadorit, Enner Valencia, nxitoi drejt golit të Curacaos brenda tre minutave të para, rezultati dukej i pashmangshëm.
...
BOTA
OKB ngre alarmin: Puna vret 840,000 njerëz në vit
PiranjatPërditësimi i fundit 23 Prill 2026, 18:52
Më shumë se 840,000 njerëz humbasin jetën çdo vit në mbarë botën si pasojë e rreziqeve psikosociale në vendin e punës, sipas një raporti të ri të publikuar nga Organizata Ndërkombëtare e Punës, agjenci e Kombet e Bashkuara. Faktorë si orët e gjata të punës, pasiguria në punë dhe ngacmimi konsiderohen ndër shkaqet kryesore që ndikojnë drejtpërdrejt në shëndetin e punëtorëve.
Raporti thekson se këto rreziqe lidhen ngushtë me sëmundjet kardiovaskulare dhe çrregullimet mendore, përfshirë vetëvrasjen. Sipas tij, puna nuk ndikon vetëm në sigurinë ekonomike, por edhe në identitetin dhe marrëdhëniet shoqërore të individëve, ndërsa mënyra e organizimit të saj mbetet faktor kyç për shëndetin.
Shefja e Politikave të Sigurisë dhe Shëndetit në Punë në ILO, Manal Azzi, e cilësoi situatën si një nga sfidat më të mëdha të botës moderne të punës, duke theksuar se përmirësimi i kushteve është thelbësor si për mirëqenien e punëtorëve, ashtu edhe për produktivitetin dhe zhvillimin e qëndrueshëm.
Sipas të dhënave, rreziqet psikosociale shkaktojnë humbjen e rreth 45 milionë viteve të jetës të rregulluara për aftësi të kufizuar (DALY) çdo vit, ndërsa kostoja ekonomike globale arrin në 1.37% të Prodhimit të Brendshëm Bruto. Në Evropë, regjistrohen mbi 112,000 vdekje dhe humbja ekonomike llogaritet në 1.43% të PBB-së.
Sëmundjet kardiovaskulare përbëjnë pjesën më të madhe të vdekjeve, ndërsa çrregullimet mendore shkaktojnë humbjen më të madhe të viteve të jetës së shëndetshme. Ndërkohë, Organizata Botërore e Shëndetësisë vlerëson se depresioni dhe ankthi çojnë në rreth 12 miliardë ditë pune të humbura çdo vit.
Efektet më të zakonshme përfshijnë depresionin, ankthin, lodhjen e tepërt fizike, çrregullimet e gjumit dhe lodhjen kronike. Shpesh, këto probleme lidhen edhe me sëmundje fizike për shkak të sjelljeve të pashëndetshme si duhanpirja, konsumimi i alkoolit dhe mungesa e aktivitetit fizik.
Raporti nënvizon se rreth 35% e punëtorëve në botë punojnë më shumë se 48 orë në javë, ndërsa puna mbi 55 orë rrit ndjeshëm rrezikun për goditje në tru dhe sëmundje të zemrës. Gjithashtu, 23% e punëtorëve raportojnë se kanë përjetuar dhunë ose ngacmim në vendin e punës.
Ndër faktorët kryesorë të rrezikut renditen orët e gjata të punës, presioni i lartë, pasiguria në punë, ngacmimi dhe mungesa e balancës mes përpjekjes dhe shpërblimit.
Në përfundim, ILO thekson se transformimi dixhital, puna në distancë dhe inteligjenca artificiale po ndryshojnë ndjeshëm mjedisin e punës, duke e bërë edhe më të domosdoshëm parandalimin e këtyre rreziqeve përmes organizimit më të mirë të punës, qartësisë së roleve dhe mbështetjes së punëtorëve pa stigma./PiranjatNews/
