Një protestuese deklaroi nga protesta kundër Ramës se qytetarët janë lodhur nga padrejtësitë dhe nga premtimet boshe.
Ajo ...
BOTA
OKB thërret mbledhje të jashtëzakonshme të Këshillit të Sigurisë, shkak njohja e Somalilandit nga Izraeli
PiranjatPërditësimi i fundit 28 Dhjetor 2025, 17:00
Këshilli i Sigurimit i Kombeve të Bashkuara do të mbajë të hënën një takim urgjent lidhur me vendimin e Izraelit për të njohur Somalilandin si shtet të pavarur, një veprim që ka shkaktuar zemërim në Somali dhe reagime të ashpra nga shumë vende të rajonit.
Të shtunën, 21 vende arabe dhe myslimane publikuan një deklaratë të përbashkët, ku paralajmëruan se ky vendim do të kishte “implikime serioze për paqen dhe sigurinë në Bririn e Afrikës”, si dhe për stabilitetin e rajonit më të gjerë të Detit të Kuq.
Deklarata, e lëshuar nga qeveria e Katarit, dënoi ashpër iniciativën e Izraelit, duke e cilësuar atë si “një shkelje serioze të parimeve të së drejtës ndërkombëtare”. Ajo dënoi gjithashtu “përpjekjet për të dëbuar me forcë palestinezët nga tokat e tyre”, mes raportimeve se njohja e Somalilandit mund të lidhet me plane për zhvendosjen e palestinezëve nga Rripi i Gazës.
Vendimi i Izraelit për të njohur Somalilandin, një provincë e shkëputur e Somalisë që deri më tani nuk ishte njohur nga asnjë shtet tjetër, u mor vetëm disa ditë para se Somalia të merrte presidencën e radhës të Këshillit të Sigurimit të OKB-së, duke shtuar më tej tensionet diplomatike.
Somalilandi shpalli njëanshmërisht pavarësinë në vitin 1991, pas rrëzimit të regjimit ushtarak të diktatorit Siad Barre dhe zhytjes së Somalisë në kaos. Që atëherë, rajoni ka funksionuar në mënyrë autonome, me institucionet e veta, monedhë, ushtri dhe polici, duke ruajtur një stabilitet relativ krahasuar me pjesën tjetër të vendit, e cila vazhdon të përballet me konflikte politike dhe sulme nga grupi islamist Al-Shabaab.
Megjithatë, mungesa e njohjes ndërkombëtare e ka lënë Somalilandin të izoluar politikisht dhe ekonomikisht, pavarësisht rëndësisë së tij strategjike pranë Ngushticës Bab el-Mandeb, një nga korridoret më të rëndësishme detare tregtare në botë që lidh Oqeanin Indian me Kanalin e Suezit.
