Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
BOTA
Pakti ushtarak Tiranë-Prishtinë-Zagreb “tremb” Serbinë. Presidenti Vuçiç: Do të mbrojmë vendin nga çdo agresion. Blejnë avionë nga Kina
PiranjatPërditësimi i fundit 3 Shtator 2025, 19:01
Presidenti serb, Aleksandar Vuçiç akuzoi të mërkurën Kroacinë, Shqipërinë dhe Kosovën për “krijimin e një aleance ushtarake kundër Serbisë”. Nga Pekini ku mori pjesë në paradën ushtarake të Kinës, Vuçiç tha se “ushtria serbe është mjaft e fortë për të penguar çdo agresion të mundshëm nga fqinjësia”, shkruajnë mediat serbe.
"Nuk është rastësi që Prishtina, Zagrebi dhe Tirana formuan një aleancë ushtarake. Dhe kjo nuk është për shkak të Austrisë, Hungarisë apo Sllovenisë, por për shkak të Serbisë... Ne nuk jemi aq budallenj sa të mos e kuptojmë pse e bënë këtë", u tha Vuçiç gazetarëve, sipas agjencisë serbe të lajmeve "Beta". "Ne duhet të jemi pengesë për ata që formojnë një aleancë ushtarake kundër nesh”, shtoi ai.
Vuçiç i referohet një deklarate mbi bashkëpunimin në mbrojtje që Kroacia, Shqipëria dhe Kosova nënshkruan në muajin mars të këtij vit dhe që tre shtetet nuk e konsiderojnë aleancë ushtarake. Dokumenti i nënshkruar thotë se bashkëpunimi synon stabilitetin dhe sigurinë në Evropën Juglindore, mbështetjen për rrugën euroatlantike dhe forcimin e aleancës së tre vendeve mike që kufizohen edhe me Serbinë. Vuçiç tha se “Serbia nuk do të prekë askënd”, por shtoi se ushtria e saj po forcohet për të mbrojtur integritetin territorial. Ai ka njoftuar një paradë ushtarake në Serbi më 20 shtator.
Blerja e armëve kineze
Sa i përket blerjes së armëve kineze, Vuçiç tha se Serbia nuk është e interesuar për raketat balistike dhe hipersonike kineze, por se Kina ka avionë shumëfunksionalë të nivelit të lartë dhe helikopterë modernë.
Duke komentuar bisedimet me përfaqësuesit e kompanisë kineze Zijin, ai tha se Serbia është e interesuar për blerje të mëtejshme të arit nga kjo kompani, e cila është pronare shumicë e Kompleksit Minierë-Trajtim Metalurgjik Bor.
“Patëm takime me kompani të rëndësishme energjetike. Biseduam me kompaninë Xpeng për makinat fluturuese. Besoj se vitin e ardhshëm, deri më 1 dhjetor, do të mund t’u tregojmë njerëzve se si funksionojnë në Serbi dhe se do të jenë në përdorim gjatë ekspozitës Ekspo2027 në Beograd”, tregoi ai.
