Detaje të reja janë zbuluar nga operacioni “Lulet e së keqes” të zhvilluar në Greqi, ku u sekuestruan 84 kg kokainë ...
BOTA
Përplasjet në OpenAI nxjerrin në dritë marrëdhënien sekrete të Shivon Zilis me Elon Musk
PiranjatPërditësimi i fundit 7 Maj 2026, 11:19
Shivon Zilis, këshilltare prej vitesh e miliarderit Elon Musk dhe nëna e katër prej fëmijëve të tij, ka dëshmuar në gjyqin e bujshëm mes Musk dhe drejtuesve të OpenAI, duke zbuluar detaje të reja mbi marrëdhënien e tyre personale dhe tensionet brenda botës së inteligjencës artificiale.
Procesi gjyqësor po zhvillohet pasi Musk ka paditur CEO-n e OpenAI, Sam Altman, dhe presidentin Greg Brockman, duke i akuzuar se kanë shndërruar organizatën, e krijuar fillimisht si jofitimprurëse, në një mjet përfitimi personal. Në dëshminë e saj, Zilis tregoi se marrëdhënia me Musk nisi vite më parë gjatë një aktiviteti pune dhe më vonë evoluoi nga një marrëveshje “plotësisht platonike” për të pasur fëmijë, në një lidhje romantike.
Ajo mohoi se kishte favorizuar Musk gjatë kohës që shërbente në bordin drejtues të OpenAI, duke theksuar se prioriteti i saj kishte qenë “AI për njerëzimin”. Dëshmia e saj hodhi dritë edhe mbi tensionet e forta mes drejtuesve të OpenAI. Sipas dëshmive në gjykatë, disa anëtarë të bordit kishin kërkuar largimin e Zilis për shkak të lidhjes së saj me Musk, por në fund ishte vendosur që ajo të qëndronte.
Zilis tha gjithashtu se marrëdhënia me Musk ishte mbajtur sekret për arsye sigurie dhe se bordin e OpenAI e kishte informuar vetëm pasi mediat kishin mësuar për historinë. Gjyqi po konsiderohet një nga përplasjet më të mëdha në industrinë e inteligjencës artificiale, pasi po nxjerr në pah konfliktet personale, luftën për pushtet dhe rivalitetin mes figurave më të fuqishme të teknologjisë në Silicon Valley./Përktheu Piranjat News
