Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
BOTA
DETAJE/ Presidenca maqedonase tronditet nga skandalet e spiunazhit
PiranjatPërditësimi i fundit 22 Maj 2026, 18:41
Një skandal i rëndë spiunazhi ka shpërthyer në Maqedoninë e Veriut, duke tronditur presidencën, institucionet e sigurisë dhe opinionin publik në vend. Autoritetet po hetojnë një administrator IT-je në zyrën presidenciale, i dyshuar për kopjim dhe kodim të të dhënave sekrete shtetërore me qëllim kalimin e tyre te shërbimet e inteligjencës të një vendi jashtë NATO.
Në qendër të hetimit është zyra e presidentes Gordana Siljanovska-Davkova, ndërsa mediat maqedonase raportojnë për një përplasje të fortë mes Prokurorisë për Krimin e Organizuar dhe Ministrisë së Brendshme lidhur me trajtimin e çështjes.
Sipas kallëzimeve të publikuara, administratori i IT-së dyshohet se ka kopjuar dhe koduar informacione të klasifikuara, ndërsa ka pretendime se zyrtarë të tjerë të kabinetit presidencial dhe strukturave të inteligjencës kanë tentuar të fshehin provat dhe të ndalojnë hetimin.
Skandali ka marrë përmasa edhe më të mëdha pas deklaratave të kreut të opozitës socialdemokrate, Venko Filipče, i cili akuzoi hapur figura të qeverisë për lidhje me shërbimet serbe dhe qarqe pro-Kremlinit.
“Ky është një skandal që duhet zbardhur plotësisht. Nëse informacionet kanë dalë nga një vend anëtar i NATO-s, atëherë kemi të bëjmë me një çështje jashtëzakonisht serioze dhe dikush duhet të mbajë përgjegjësi, përfshirë presidenten”, deklaroi Filipçe.
Ai drejtoi akuza të forta ndaj zëvendëskryeministrit Ivan Stoilković, për të cilin tha se bashkëpunon me shërbimet sekrete serbe dhe mban lidhje me grupin nacionalist rus “Night Wolves”, të afërt me presidentin rus Vladimir Putin.
“Kemi një zëvendëskryeministër që bashkëpunon me shërbimet serbe dhe qarqe pro-Kremlinit. Informacionet sensitive po dalin çdo ditë nga vendi”, tha lideri i opozitës.
Nga ana tjetër, kryeministri Hristijan Mickoski tentoi të minimizojë ngjarjen, duke deklaruar se bëhet fjalë për “mbetje të strukturave të vjetra të spiunazhit”.
Skandali shpërthen në një moment tepër delikat për Maqedoninë e Veriut, mes tensioneve politike, dyshimeve për influencë ruse dhe serbe në qeveri, si dhe debatit të fortë mbi të drejtat e shqiptarëve dhe përdorimin e gjuhës shqipe në institucionet shtetërore.
