Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
BOTA
Presidenti i Malit të Zi në Bruksel, pas miratimit të rezolutës për Jasenovacin
n.fPërditësimi i fundit 2 Korrik 2024, 14:29
Presidenti i Malit te Zi
MAL I ZI- Presidenti i Malit të Zi, Jakov Millatoviç, tha se shoqëria malazeze, pothuajse në tërësi, mbështet anëtarësimin e vendit në Bashkimin Evropian - gjë që, sipas tij, i detyron vendimmarrësit të punojnë me përkushtim drejt realizimit të këtij qëllimi.
“Me veprime mendjengushta, Mali i Zi nuk duhet ta humbasë mundësinë që së shpejti të bëhet anëtar i plotë i BE-së”, tha ai.
Millatoviç i bëri komentet gjatë një takimi me presidentin e Këshillit Evropian, Charles Michel, të martën në Bruksel. Ishte ky takimi i parë mes zyrtarëve nga Podgorica dhe Brukseli pas miratimit të Rezolutës për Jasenovacin në Kuvendin e Malit të Zi.
Kjo rezolutë ishte pikërisht arsyeja përse takimi u zhvillua në Bruksel dhe jo në Podgoricë. Michel e anuloi udhëtimin në kryeqytetin e Malit të Zi, pasi Parlamenti i këtij vendi miratoi Rezolutën për Jasenovacin më 28 qershor.
Në shpjegimin e kabinetit të Michelit nuk u përmend Rezoluta, por u tha se presidenti i Këshillit Evropian e shtyu vizitën e planifikuar në Mal të Zi më 2 dhe 3 korrik, “për të siguruar bisedime të suksesshme me bashkëbiseduesit kryesorë të këtij vendi, të cilat nuk duhet të mbeten nën hijen e ngjarjeve të fundit”.
Shumica parlamentare e Parlamentit të Malit të Zi votoi për Rezolutën për gjenocidin në Jasenovac më 28 qershor. Jasenovaci - 70 km në lindje të kryeqytetit të Kroacisë, Zagreb - është i njohur për vrasjet masive të hebrenjve, serbëve, romëve dhe kroatëve antifashistë gjatë Luftës së Dytë Botërore.
Vlerësimet e numrit të të vrarëve atje ndryshojnë, por historianët e pavarur thonë se ai sillet midis 80.000 dhe 100.000. Qeveria kroate i konsideron ngjarjet atje si krim të Luftës së Dytë Botërore. Në ditën kur u miratua rezoluta në Mal të Zi, Kroacia tha se ky veprim nuk i kontribuon ndërtimit të një kulture të përkujtimit, por se është “instrumentalizim i viktimave të Jasenovacit” për qëllime politike ditore.
Presidenti kroat, Zoran Millanoviç, gjatë një bisede telefonike me homologun malazez, Jakov Millatoviq, tha se rezoluta është një akt i dëmshëm që “rëndon në mënyrë të panevojshme mbi marrëdhëniet ndërmjet dy shteteve”.
Pas kësaj bisede, në platformën X reagoi edhe Millatoviç: “Kemi rënë dakord se është detyrë e jona e përbashkët që t’i kujtojmë me nderim të gjitha viktimat e gjenocidit në Jasenovac, e jo që të tregtohet politikisht me viktimat dhe krimin, të cilin askush nuk e mohon”.
Rezoluta për Jasenovacin ishte një përgjigje politike e forcave proserbe në Mal të Zi ndaj mbështetjes së Qeverisë malazeze për Rezolutën e Kombeve të Bashkuara për gjenocidin në Srebrenicë, e cila u miratua në fund të majit. Rezolutën për Srebrenicën e kundërshtuan zyrtarët proserbë të Malit të Zi, përfshirë kryetarin e Kuvendit, Andrija Mandiç./ REL
