Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
BOTA
Putin shkon në Budapest, Kaja Kallas: Ka një urdhër arresti nga Gjykata Penale Ndërkombëtare, nuk është mirë
PiranjatPërditësimi i fundit 20 Tetor 2025, 14:47
Shefja e politikës së jashtme të Bashkimit Europian, Kaja Kallas, ka deklaruar se një udhëtim i mundshëm i presidentit rus, Vladimir Putin, në Budapest për bisedime mbi Ukrainën, nuk është i mirëpritur nga BE. Kallas theksoi se Putin përballet me një urdhër arresti nga Gjykata Ndërkombëtare Penale, e cila ka lëshuar akuzë për krime lufte kundër tij, dhe se Hungaria është duke kaluar një proces për t'u larguar nga kjo gjykatë.
“Jo, nuk është e mirë. Të shohësh dikë ndaj të cilit ka një urdhër arresti nga Gjykata Penale Ndërkombëtare që po vjen në një vend europian… Pyetja është nëse do ketë rezultate nga kjo,” tha Kallas për mediat.
Ajo po ashtu njoftoi se një paketë e re sanksionesh ndaj Moskës do të miratohet brenda kësaj jave, duke theksuar se Rusia vazhdon të refuzojë çdo përpjekje për paqe. "Ne shohim përpjekjet e presidentit Trump për të sjellë paqe, sigurisht, këto përpjekje janë të mirëpritura, por ne nuk shohim që Rusia dëshiron paqe. Rusia kupton vetëm përmes forcës dhe negocion vetëm kur është e detyruar të negociojë," shtoi Kallas. Paketa e 19-të e sanksioneve është pritur të miratohet në nivelin e BE-së këtë javë.
Kallas gjithashtu theksoi se është jetësore që presidenti ukrainas, Volodimir Zelensky, të takohet me presidentin rus, për të shqyrtuar mundësitë për një armëpushim. Në të njëjtën linjë, ministri i Jashtëm francez, Jean-Noël Barrot, tha se prania e Putinit në territorin e Bashkimit Europian do të kishte kuptim vetëm nëse do të çonte në një armëpushim të menjëhershëm dhe pa kushte.
