Kreu i grupit të PS-së, Taulant Balla, gjatë një prononcimi për gazetarët pas mbledhjes së Kuvendit ka folur për protest...
BOTA
Sekretari i Marinës së SHBA, John Phelan u rendit si pasagjer në aeroplanin privat të Jeffrey Epstein në vitin 2006
PiranjatPërditësimi i fundit 7 Shkurt 2026, 20:50
Sekretari i Marinës së SHBA-së, John Phelan, figuron në një manifest (deklaratë e shkruar), fluturimi të gjetur mes miliona dokumenteve të lidhura me shkelësin e dënuar seksual Jeffrey Epstein, të cilat janë publikuar muajt e fundit. Dokumentet tregojnë se ai fluturoi në vitin 2006 nga Londra në Nju Jork me avionin privat të Epstein.
Manifesti e liston Phelan-in së bashku me 12 pasagjerë të tjerë, përfshirë Epstein-in dhe me sa duket Jean-Luc Brunel, një agjent francez mode dhe bashkëpunëtor i ngushtë i Epstein, i cili po përballej me akuza për sulm seksual dhe përdhunim të një të mituri kur u gjet i vdekur në qelinë e tij të burgut në vitin 2022. Emri i Brunel-it duket se është shkruar gabim në manifest si “Jean Luk Brunnel”.
Gjashtë emra në listë janë të redaktuar. Fluturimi u nis nga Londra drejt Nju Jorkut pasditen e 3 marsit 2006. Phelan refuzoi të komentojë përmes një zëdhënësi të Marinës. shkruan Piranjat.news. Një mik i ngushtë i Phelan-it konfirmoi se ai ishte në bord të fluturimit, por theksoi se kjo ishte e vetmja herë që Phelan kishte ndonjë kontakt me Epstein-in dhe se ai ishte ftuar të fluturonte nga CEO i Bear Stearns, Jimmy Cayne, i cili vdiq në vitin 2021.
Trump e njoftoi Phelan si zgjedhjen e tij për sekretar të Marinës në nëntor 2024, duke thënë se ai "ka shkëlqyer në çdo përpjekje".
Phelan, i cili në atë kohë punonte në sektorin financiar, nuk e dinte se do të udhëtonte me avionin e Epstein-it derisa mbërritën, tha miku i tij për CNN. Gjatë fluturimit, Epstein u prezantoi financierëve të tjerë një koncept tatimor për të cilin Phelan “nuk kishte aspak interes”, sipas mikut, dhe Phelan nuk foli apo nuk pati më asnjë ndërveprim me Epstein-in pas kësaj.
Tre pasagjerë të tjerë, të gjithë me lidhje të dukshme me sektorin financiar, janë të listuar në dokument. Sipas detajeve në manifest, avioni një Boeing 727, ishte një nga avionët famëkeq në pronësi të Epstein-it. Nuk ka asnjë provë që Phelan ishte në dijeni të ndonjë veprimtarie të paligjshme të Epstein-it apo bashkëpunëtorëve të tij kur mori këtë fluturim. Epstein u padit për herë të parë në Florida disa muaj më vonë, në korrik 2006, për kërkim të shërbimeve të prostitucionit, një vepër penale.
Phelan, një biznesmen pa përvojë të mëparshme ushtarake, ishte më parë themelues dhe kryetar i Rugger Management LLC, një firmë private investimi që e krijoi në vitin 2022, përpara se të konfirmohej si sekretar i Marinës në mars 2025. Manifesti ishte pjesë e një publikimi dokumentesh nga Komiteti i Mbikëqyrjes së Dhomës së Përfaqësuesve vitin e kaluar. Redaktimet nëpër dokumente përdoren kryesisht për të mbrojtur emrat e viktimave dhe informacione të tjera identifikuese, sipas faqes së Departamentit të Drejtësisë që i publikon dosjet. Departamenti i Drejtësisë publikoi rreth tre milionë dokumente të tjera lidhur me Epstein-in javën e kaluar, shkruan Piranjat.news
Phelan dhe bashkëshortja e tij janë koleksionistë të njohur arti dhe kanë mbledhur miliona dollarë fonde për fushatën e Presidentit Donald Trump, përfshirë organizimin e një darke luksoze për mbledhje fondesh për Trump në gusht 2024. Trump e shpalli Phelan-in si zgjedhjen e tij për sekretar të Marinës në nëntor 2024, duke thënë se ai ka “shkëlqyer në çdo përpjekje”.
“John do të jetë një forcë e jashtëzakonshme për shërbyesit tanë detarë dhe një udhëheqës i palëkundur në avancimin e vizionit tim ‘America First’,” tha Trump në atë kohë, shkruan Piranjat.news. “Ai do ta vendosë biznesin e Marinës së SHBA-së mbi gjithçka tjetër.”
Emrat e disa zyrtarëve të tjerë aktualë dhe ish-zyrtarë të administratës Trump shfaqen në publikimin më të fundit të dosjeve të Epstein-it, përfshirë vetë presidentin; Sekretarin e Tregtisë Howard Lutnick; ish-Sekretarin e Punës Alexander Acosta; ish-strategun kryesor të Shtëpisë së Bardhë Steve Bannon; dhe Elon Musk, i cili drejtoi për disa muaj Departamentin e Efiçencës Qeveritare të Trump. Autoritetet nuk i kanë akuzuar asnjërin prej tyre për ndonjë shkelje ligjore./ CNN, përktheu M.K-Piranjat.news
