Dashi
Përpiquni të shmangni polemikat dhe diskutimet. Edhe me fjalë nëse është e mundur thoni se jeni të disponueshëm p...
BOTA
Si një projekt pyllëzimi i viteve 1950 e ktheu Japoninë në vendin me krizën më të madhe të alergjive
PiranjatPërditësimi i fundit 21 Maj 2026, 10:11
Një vendim i marrë 70 vjet më parë për të ripyllëzuar zona të mëdha të Japonisë me vetëm dy lloje pemësh është kthyer sot në një problem serioz për vendin.
Në shkurt, video që dukeshin si re tymi mbi pyjet me gjelbërim të përhershëm u bënë virale në Japoni. Por nuk ishte tym – ishte polen. Pamjet shërbyen si paralajmërim për dhjetëra miliona banorë: të përgatisnin maskat dhe ilaçet kundër alergjive.
Çdo pranverë, e cila po vjen gjithnjë e më herët për shkak të ndryshimeve klimatike, njerëzit në Japoni shihen me maska në rrugë për shkak të etheve të barit (hay fever), të shkaktuara nga sasia e madhe e polenit.
Sot, alergjitë sezonale janë kthyer në një krizë kombëtare në Japoni. Rreth 43% e popullsisë përjeton simptoma mesatare ose të rënda, krahasuar me 26% në Britani dhe 12-18% në SHBA.
Përveç shqetësimeve fizike, alergjitë shkaktojnë mungesë gjumi, probleme përqendrimi dhe rrisin rrezikun për sëmundje të tjera si astma apo alergjitë ushqimore. Në kulmin e sezonit të polenit, ndikimi ekonomik nga mungesat në punë dhe ulja e konsumit arrin rreth 1.6 miliardë dollarë në ditë.
Por pse Japonia ka kaq shumë alergji?
Shkaku lidhet me vendimet e marra pas Luftës së Dytë Botërore. Gjatë luftës, mungesa e naftës dhe gazit bëri që Japonia të përdorte pyjet si burim kryesor energjie, duke shkaktuar shpyllëzim masiv. Për të parandaluar erozionin dhe rrëshqitjet e dheut, qeveria nisi një program të madh ripyllëzimi në vitet 1950 dhe 1960.
Për të rigjallëruar shpejt pyjet, u mbollën kryesisht dy lloje pemësh me rritje të shpejtë: kedri japonez (sugi) dhe selvia japoneze (hinoki). Sot, këto pyje artificiale mbulojnë rreth 10 milionë hektarë, ose një të pestën e territorit të Japonisë.
Problemi është se këto pemë prodhojnë sasi shumë të mëdha poleni, i cili shpërndahet lehtësisht drejt qyteteve. Situata është përkeqësuar sepse pemët, tashmë mbi 30 vjeç, prodhojnë edhe më shumë polen.
“Poleni është kthyer në një problem kombëtar shëndetësor,” thotë Noriko Sato, profesore dhe studiuese e pyjeve në Universitetin Kyushu.
Në vitin 2023, Japonia e shpalli alergjinë problem social kombëtar dhe vendosi objektivin për të ulur nivelin e polenit me 50% brenda 30 viteve. Si hap i parë, synohet reduktimi me 20% i pyjeve me kedra sugi.
Megjithatë, kjo është një sfidë gjigante. Japonia është një nga vendet më të pyllëzuara në botën e industrializuar, me pyje që mbulojnë 68% të territorit të saj.
Në disa zona tashmë kanë nisur projekte për kthimin e pyjeve artificiale në pyje natyrore me biodiversitet më të pasur. Në qytetin Kobe, autoritetet po zëvendësojnë pyjet monokulturë me pyje natyrore me gjethe të gjera, duke rikthyer kafshët, insektet dhe ekosistemet e humbura.
Studiuesit po përdorin edhe metoda të tjera për të luftuar alergjitë:
-monitorimin dhe parashikimin e shpërndarjes së polenit; -mbjelljen e pemëve që prodhojnë më pak polen; zhvillimin e trajtimeve të reja mjekësore;
madje edhe eksperimente me oriz të modifikuar gjenetikisht për të lehtësuar simptomat alergjike.
Qeveria japoneze ka vendosur gjithashtu një taksë të re prej 1000 jenësh në vit për banorët, për të financuar menaxhimin e qëndrueshëm të pyjeve dhe zëvendësimin e pemëve problematike.
Megjithatë, ekspertët paralajmërojnë se Japonia duhet të mendojë afatgjatë. Sipas tyre, fokusi nuk duhet të jetë vetëm ulja e alergjive, por edhe ruajtja e biodiversitetit, mbrojtja nga ndryshimet klimatike dhe menaxhimi i qëndrueshëm i pyjeve për dekadat e ardhshme./Përktheu Piranjat News
