Drafti i ri për taksën e pasurive të paluajtshme pritet të rrisë deri në 25% detyrimin e taksës së ndërtesës...
BOTA
Të pasurit po largohen nga New York-u? Ja cila është arsyeja
PiranjatPërditësimi i fundit 6 Prill 2026, 13:01
Njëqind e njëzet e pesëmijë. Një shifër monstrë që përmbledh një fenomen që, në Amerikë dhe jo vetëm, po bën që ekonomistët të diskutojnë. Bëhet fjalë për numrin e të pasurve (dhe super-të pasurve) që “ikën” nga shteti i New York-ut për t’u “strehuar” në Florida dhe Texas, ku taksat janë dukshëm më të ulëta. Një ndryshim strategjik i vendbanimit, që megjithatë ka shkaktuar një mungesë prej 14 miliardë dollarësh të të ardhurave fiskale në kasën e shtetit, i cili tani, duke njohur emergjencën, po përpiqet të gjejë zgjidhje.
“Arratia e madhe”
Sipas ekspertëve, kjo “arrati” ka nisur gjatë periudhës së Covid, kur shteti i New York-ut vendosi disa kufizime që popullsia i konsideroi “të ashpra”. Situata u përkeqësua më tej gjatë fushatës elektorale të vitit 2022, kur e ardhmja guvernatore demokrate Kathy Hochul i ftoi republikanët të largoheshin nga New York-u: “Merrni një autobus dhe shkoni në Florida. Aty është vendi juaj! Ju nuk përfaqësoni vlerat tona, nuk jeni newyorkezë”. Republikanët (ata të pasur) e morën fjalën seriozisht, duke lënë shtetin dhe duke shkaktuar… një boshllëk në buxhet. Tani Hochul po përpiqet të gjejë zgjidhje.
Kundër-propozimi i Hochul
“Do të zbatojmë një sistem që nuk kufizohet vetëm në taksimin për hir të taksimit, por që merr parasysh gjithashtu faktin se më duhen njerëz me pasuri të mëdha për të mbështetur programet sociale bujare të shtetit tonë,” tha Hochul, duke ftuar “milionerët demokrate” që të “shkojnë në Palm Beach” – në Florida, pikërisht – “për të rikthyer njerëzit këtu në New York, sepse baza jonë fiskale ka pësuar një erozion”.
Guvernatorja demokrate përfundoi: “Nuk kam ndjenja të keqe për të rritur taksat, por jam në konkurrencë me shtete ku presioni fiskal është më i ulët.”
Pse është kaq e favorshme Florida?
Florida, e konsideruar një “parajsë fiskale” në Shtetet e Bashkuara, tërheq investitorë dhe sipërmarrës për shkak të mungesës së taksës shtetërore mbi të ardhurat personale. Ajo ofron norma të ulëta tatimore për bizneset, nuk ka taksa shtetërore mbi trashëgiminë ose dhurimet dhe ka një regjim fiskal gjithpërfshirës të favorshëm, duke pasur presion fiskal të ulët.
Në New York, nga ana tjetër, taksa shtetërore mbi të ardhurat mund të arrijë deri në 10,9% për të ardhurat e larta, ndërsa taksat mbi pasuritë variojnë. Sipas të dhënave të fillimit të vitit 2026, shteti mund të “krenohej” me ngarkesën fiskale të kombinuar më të lartë në SHBA. Një çështje jo e vogël, duke marrë parasysh se “të pasurit e mëdhenj” përbëjnë më pak se 1% të tatimpaguesve totalë, por paguajnë rreth 41% të taksës totale mbi të ardhurat./Përktheu Piranjat News
