Gazetarja e njohur e Vlorës, Afrovita Hysaj ka treguar momentet e fundit të kolegut dhe mikut Enrik Mehmeti drejt Zvërnecit, mbrëmjen e t&...
BOTA
Të shtënat me armë zjarri në shkollën ku humbën jetën 11 persona/ kryeministri i Suedisë: Sulmi masiv më i keq në historinë e vendit
E.DPërditësimi i fundit 5 Shkurt 2025, 08:01
SUEDI- Policia suedeze ka thënë se 11 persona janë vrarë nga të shtënat me armë zjarri në qendër arsimore. Sulmi ndodhi rreth orës 12:30 me orën lokale në Campus Risbergska në qytetin e Orebro, rreth 200 km në perëndim të kryeqytetit Stokholm. Kryeministri suedez Ulf Kristersson ka dënuar të shtënat tragjike, duke e quajtur atë ngjarjen më të keqe në historinë e vendit.
“Sot, ne kemi qenë dëshmitarë të dhunës brutale, vdekjeprurëse ndaj njerëzve krejtësisht të pafajshëm. Këto janë të shtënat masive më të këqija që ka përjetuar ndonjëherë Suedia”, tha Kristersson në një konferencë shtypi.
Një zëdhënës tha në një konferencë shtypi të martën në mbrëmje se policia beson se autori ka vdekur dhe ka vepruar i vetëm. Policia tha se ka kryer hetime në adresa të ndryshme në Orebro, me personel teknik që punonte në vendngjarje.
“Për momentin, policia beson se autori ka vepruar i vetëm, por ne nuk mund të përjashtojmë më shumë autorë të lidhur me incidentin”, thuhet në përditësimin në faqen e internetit të policisë suedeze.
Policia tha gjithashtu se ata nuk e dinë motivin, por nuk besojnë se është terrorizëm, duke shtuar se ata nuk kishin asnjë shenjë paralajmëruese për sulmin. Gjithashtu efektivët po punojnë për identifikimin e autorit dhe viktimave.
"Kur vjen puna për të thënë diçka më shumë për autorin, është ende shumë herët. Operacioni është në vazhdim dhe kjo padyshim do të bëhet më e qartë. Por ne po punojmë shumë intensivisht tani," thuhet në deklaratë.
Ai e përshkroi sulmin si një incident të tmerrshëm, duke e quajtur atë të jashtëzakonshëm dhe një makth. I armatosuri i dyshuar nuk ishte i njohur më parë për policinë.
