Kreu i grupit të PS-së, Taulant Balla, gjatë një prononcimi për gazetarët pas mbledhjes së Kuvendit ka folur për protest...
BOTA
Thesari amerikan po planifikon të presë monedha me imazhin e Donald Trump
PiranjatPërditësimi i fundit 4 Tetor 2025, 07:47
Departamenti i Thesarit të SHBA-ve po shqyrton një plan për të prerë monedha të reja 1 dollarëshe me imazhin e presidentit Donald Trump, si pjesë e nismës për të përkujtuar 250-vjetorin e themelimit të Amerikës, ka mësuar FOX Business.
“Pavarësisht bllokimit të detyruar të qeverisë nga e majta radikale, faktet janë të qarta: Nën udhëheqjen historike të presidentit Donald J. Trump, vendi ynë po hyn në 250-vjetorin më i fortë, më i begatë dhe më i mirë se kurrë”, ka thënë një zëdhënës i Thesarit për FOX Business.
“Edhe pse dizajni përfundimtar i monedhës përkujtimore ende nuk është zgjedhur, ky draft i parë reflekton mirë shpirtin e vendit tonë dhe të demokracisë, edhe përballë pengesave të mëdha. Së shpejti do të ndajmë më shumë detaje”, ka vijuar ai.
Imazhi i monedhës mendohet të jetë i tillë: Trump përpara flamurit amerikan, me grushtin e ngritur, dhe ngjan me fotografinë e shpërndarë gjerësisht nga atentati vitin e kaluar në Pensilvani, kur Trump u plagos lehtë në vesh.
Departamenti i Thesarit ka autoritetin ligjor për të prerë monedha përkujtimore 1 dollarëshe, përfshirë rastet e veçanta siç është 250-vjetori i pavarësisë së SHBA-ve. Dy monedhat përkujtimore më të fundit të prera nga Shtetet e Bashkuara ishin monedha e Harriet Tubman dhe ajo e Gjeneratës së Madhe, të hedhura në treg në vitin 2024.
Monedha përkujtimore më e shitur e të gjitha kohërave mbetet ajo e vitit 1986 për Statujën e Lirisë, me afro 15.5 milionë monedha të shitura.
Programi i fundit për monedha përkujtimore që kaloi shifrën 1 milionë kopje të shitura ishte ai i viteve 1995-1996 për 100-vjetorin e Lojërave Olimpike, kur Atlanta priti Olimpiadën e vitit 1996. Nga kjo seri u shitën mbi 2.4 milionë monedha.
Ndërkohë, monedha gjysmë-dollarëshe për 250-vjetorin e George Washington, e lëshuar në vitin 1982, pati mbi 7.1 milionë kopje të shitura. Gjithashtu, monedhat olimpike të viteve 1983-1984 për Lojërat e Los Angeles u shitën mbi 5 milionë copë, ndërsa ato të vitit 1987 për 200-vjetorin e Kushtetutës amerikane kaluan shifrën 4 milionë të shitura.
