Çmimet e larta të karburanteve po rëndojnë mbi buxhetet familjare dhe po ndryshojnë zakonet e përdorimit të automjeteve. ...
BOTA
Tragjedi në Modena: I riu pa patentë përplas për vdekje të moshuarën gjatë arratisjes nga policia
PiranjatPërditësimi i fundit 2 Mars 2026, 10:30
Një 89-vjeçare ka humbur jetën pas një aksidenti tragjik në Modena, i shkaktuar nga një 20-vjeçar pa patentë dhe me makinë të pasiguruar, i cili po përpiqej t’i shpëtonte një kontrolli policor. I riu u përplas ballë për ballë me një automjet tjetër, duke plagosur drejtuesen dhe duke i shkaktuar plagë fatale të moshuarës që ndodhej në makinë.
I riu 20-vjeçar që ishte në timon nuk e kishte marrë kurrë patentën dhe Alfa 159 e tij nuk ishte e siguruar. Sapo një patrullë u përpoq ta ndalonte për një kontroll rrugor, ai nisi të lëvizte me shpejtësi nëpër rrugët e Modenës në përpjekje për t’u shpëtuar forcave të rendit. Megjithatë, arratisja zgjati pak dhe përfundoi në mënyrën më të keqe: teksa po kalonte në rrugën Ciro Menotti, u përplas ballë për ballë me një makinë tjetër, një Lancia Y, duke plagosur vajzën që ishte në timon dhe nënën e saj 89-vjeçare, e cila, për shkak të plagëve të marra, ndërroi jetë pas shtrimit në terapi intensive në spitalin e Baggiovaras.
Pas aksidentit, 20-vjeçari, së bashku me tre personat e tjerë që ndodheshin në makinë, u përpoqën të arratiseshin në këmbë, por ai u ndalua menjëherë nga karabinierët bashkë me dy pasagjerë të tjerë, të cilët rezultuan të mitur. Ndërkohë, vijojnë kërkimet për të identifikuar dhe shoqëruar në komisariat pasagjerin e katërt, i cili arriti të largohej.
Drejtuesi i mjetit u arrestua për veprat penale të vrasjes rrugore të rënduar, kundërshtim të zyrtarit publik dhe mosdhënie ndihme, dhe me urdhër të Prokurorisë së Republikës së Modenës u dërgua në burgun Sant’Anna të Modenës, në pritje të seancës për vlerësimin e arrestit.
Kryetari i bashkisë së Modenës:“Makinë e drejtuar nga kriminelë”
“Shpreh ngushëllimet e mia për vajzën dhe për të gjithë familjarët e gruas që u përfshi në aksidentin e tmerrshëm të shkaktuar nga një makinë e drejtuar nga kriminelë, të cilët me sjelljen e tyre shkaktuan vdekjen e saj dhe përhapën frikë e shqetësim në zonën e përfshirë”, ishin fjalët e kryetarit të bashkisë së Modenës, Massimo Mezzetti.
Kryebashkiaku falënderoi gjithashtu karabinierët për ndërhyrjen e menjëhershme: “Falënderoj karabinierët për ndërhyrjen e shpejtë dhe vendimtare që bëri të mundur vënien përpara drejtësisë të përgjegjësve./Përktheu Piranjat News
