Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
BOTA
Trazirat në Iran, lideri suprem planifikon të arratiset në Moskë nëse protestat intensifikohen
PiranjatPërditësimi i fundit 5 Janar 2026, 14:29
Lideri Suprem i Iranit, Ajatollahu iranian Ali Khamenei ka një plan rezervë për t’u larguar nga vendi në rast se forcat e tij të sigurisë nuk do të arrijnë t’i shtypin protestat e fundit që kanë përfshirë vendin.
Duke cituar një raport të shërbimeve sekrete, The Times shkruan se Khamenei, 86 vjeç, planifikon të largohet nga Teherani së bashku me një rreth të ngushtë prej 20 personash-ndihmë e familjarë të tij- nëse sheh se ushtria dhe forcat e sigurisë të thirrura për të shtypur dezertojnë, kalojnë në anën tjetër ose nuk po zbatojnë urdhrat.
“‘Plani B’ është për arratisjen direkt Moskës së Khameneit dhe rrethit të tij shumë të afërt të bashkëpunëtorëve dhe familjarëve, përfshirë djalin e tij dhe trashëgimtarin e përcaktuar të pushtetit, Mojtaba,” tha për The Times një burim i inteligjencës.
Beni Sabti, që ka shërbyer për dekada me radhë në radhët e inteligjencës izraelite, pohoi se Khamenei do të shkojë në Rusi sepse “nuk ka vend tjetër për të”.
Plani i arratisjes bazohet tek ai i largimit të aleatit të tij, ish-udhëheqësit sirian Bashar al-Assad, i cili u largua nga Damasku me avion drejt Moskës për t’iu bashkuar familjes së tij përpara se forcat opozitare të sulmonin kryeqytetin në dhjetor 2024.
“Ata kanë planifikuar një rrugë daljeje nga Teherani në rast se ndiejnë nevojën për t’u larguar,” tha burimi, duke shtuar se kjo përfshin “grumbullimin e aseteve, pronave jashtë vendit dhe parave kesh për të lehtësuar kalimin e tyre të sigurt”. Khamenei kontrollon një rrjet të madh asetesh, disa prej të cilave i menaxhon një nga organizatat më të fuqishme në Iran, Setad, pjesë e një sistemi fondacionesh bamirësie gjysmë-shtetërore të njohura për mungesën e transparencës financiare.
Vlera e tyre llogaritet në rreth 95 miliardë dollarë, sipas një hetimi të Reuters në vitin 2013, përfshirë prona dhe kompani, të gjitha të mbajtura dhe të kontrolluara nga Khamenei.
