Ish-zëvendëskryeministri Arben Ahmetaj ka deklaruar se koordinatori i kryeministrit Edi Rama e ka kërcënuar. Në një intervist...
BOTA
Trump bie dakord me Guvernatorin për tërheqjen e agjentëve nga Minesota pas vrasjes së infermierit
PiranjatPërditësimi i fundit 26 Janar 2026, 22:29
Presidenti amerikan Donald Trump ka rënë dakord të shqyrtojë mundësinë e tërheqjes së një pjese të agjentëve të policisë së emigracionit (ICE) nga Minesota, bëri të ditur zyra e guvernatorit të shtetit, Tim Walz, pas një bisede telefonike mes dy palëve të hënën. Sipas njoftimit zyrtar, biseda u cilësua si “produktive”, gjatë së cilës Trump pranoi të shqyrtojë uljen e numrit të agjentëve federalë në Minesota dhe të bashkëpunojë më ngushtë me autoritetet shtetërore për zbatimin e ligjeve të emigracionit, veçanërisht ndaj kriminelëve të dhunshëm. Po ashtu, presidenti ra dakord të diskutojë me Departamentin e Sigurisë Kombëtare, në mënyrë që autoritetet e Minesotës të mund të zhvillojnë një hetim të pavarur për ngjarjet e fundit.
Ndërkohë, Trump e ka cilësuar vdekjen e Alex Pretti-t si një “tragjedi”, por sipas tij ajo është pasojë e asaj që ai e quan “rezistencë e qëllimshme dhe armiqësore” nga demokratët, deklaroi zëdhënësja e Shtëpisë së Bardhë, Karoline Leavitt. Ajo shtoi se presidenti nuk dëshiron të shohë njerëz të plagosur apo të vrarë në rrugë, por kërkon “fundin e rezistencës dhe kaosit” lidhur me politikat e dëbimit të emigrantëve.
Më herët, Trump shkroi në rrjetin Truth Social se guvernatori Walz e kishte telefonuar për të bashkëpunuar lidhur me situatën në Minesota dhe se ishte shprehur i kënaqur me dërgimin e “carit të kufijve”, Tom Homan, në këtë shtet.
“Ishte një telefonatë shumë e mirë dhe dukej se ishim në të njëjtën linjë. I thashë guvernatorit se do t’i kërkoja Tom Homanit ta kontaktonte dhe se synimi ynë është arrestimi i kriminelëve. Guvernatori e kuptoi këtë dhe ishte i kënaqur që Homan po shkonte në Minesota, ashtu si edhe unë”, shkroi Trump.
Ai shtoi se kriminaliteti në Minesota ka rënë ndjeshëm, por si ai ashtu edhe guvernatori dëshirojnë që të ulet edhe më tej.
Dy ditë pas vrasjes së Alex Pretti-t nga agjentët e ICE-s, kjo komunikim mes presidentit dhe guvernatorit shihet si një përpjekje për uljen e tensioneve. Megjithatë, siç vëren The Guardian, situata mund të tensionohet sërish nga një vendim i pritshëm i një gjykate federale për ligjshmërinë e operacionit “Metro Surge” kundër emigrantëve, që pritet të merret sot ose në ditët në vijim.
