Një 22-vjeçar është arrestuar ditën e sotme në qytetin e Tiranës, pasi i është prezantuar efektivëve t&eum...
BOTA
Turqia e konfirmon: 20 ushtarë humbën jetën në avionin e rrëzuar në lindje të Gjeorgjisë
PiranjatPërditësimi i fundit 12 Nëntor 2025, 09:59
Autoritetet turke kanë konfirmuar se njëzet ushtarë kanë humbur jetën në rrëzimin e një avioni ushtarak të mallrave C-130 në lindje të Gjeorgjisë, ngjarje që ndodhi ditën e djeshme.
Në një deklaratë të publikuar mbrëmjen e së martës, Ministria e Mbrojtjes e Turqisë njoftoi se të gjithë personat në bord janë shpallur “martirë”.
“Bashkëluftëtarët tanë heroikë u bënë martirë më 11 nëntor 2025,” thuhet në komunikatën e ministrisë, e cituar nga televizioni shtetëror TRT. Ministria ka publikuar emrat dhe fotot e viktimave, por ende nuk ka dhënë detaje mbi shkaqet e mundshme të aksidentit. Sipas autoriteteve turke, një ekip hetimor ushtarak ka mbërritur në zonën malore ku ndodhi rrëzimi në orën 6:30 të mëngjesit me orën lokale për të filluar analizën e rrënojave. Hetimet po kryhen në bashkëpunim me autoritetet gjeorgjiane.
Mediat lokale raportojnë se pjesë të avionit janë gjetur të shpërndara në një zonë të vështirë për t’u arritur, ndërsa moti i keq po e pengon punën e ekipeve të kërkim-shpëtimit.
Presidenti Recep Tayyip Erdoğan dhe ministri i mbrojtjes Yaşar Güler kanë shprehur ngushëllime për familjet e ushtarëve të vrarë, duke theksuar se “kombit i është shtuar një tjetër plagë e rëndë”.
“Shpirtrat e djemve tanë të rënë do të kujtohen gjithmonë me nder dhe krenari,” tha ministri Güler në një deklaratë të shkurtër për mediat.
