Drejtori i Përgjithshëm i Policisë së Shtetit, Skënder Hita ka mbërritur në Drejtorinë e Policisë së Kor&cce...
BOTA
U vra bashkë me punëtorin shqiptar, mbesa e pronarit grek të kampingut: Dyshoj se ka dhe familjarë të përfshirë, hetoni
PiranjatPërditësimi i fundit 29 Tetor 2025, 16:21
Hetuesja ka në duar të gjithë materialin nga vrasja e dyfishtë në Finikounda më 5 tetor, e pronarit grek të kampingut dhe punëtorit të tij shqiptar, të cilit i kishte lënë gjysmën e pasurisë. Avokatja e mbesës së pronarit të kampingut deklaroi se klientja e saj ka kërkuar që t’i hiqet privatësia telefonike, pasi kërkon që të zbardhet plotësisht krimi dhe personat e përfshirë deri në familje, pasi ka dyshime të forta.
“Ajo ishte mbesa e tij e dashur, ata flisnin bashkë çdo ditë”, tha ajo.
Më konkretisht, Katerina Fragaki, avokate e mbesës së 68-vjeçarit, vuri në dukje:
“Të premten e kaluar ishim në Kalamata, ku pashë të gjithë sistemin të funksiononte shumë shpejt. Meqenëse kam trajtuar raste të tjera të tilla, këtu shoh reflekse vërtet të shpejta, diçka që na ka bërë veçanërisht të lumtur, sepse klientja ime është një dëshmitare shumë e rëndësishme”.
“Mos të harrojmë se ajo ishte mbesa e tij e dashur, me të cilën ai (viktima) fliste çdo ditë, duke shkëmbyer shumë mesazhe. Problemi ynë i vetëm është se për fat të keq telefoni i saj celular nuk i ka ruajtur mesazhet për momentin dhe nuk kemi shumë materiale të rëndësishme. Në ditët në vijim do të bëjmë gjithçka që mundemi që privatësia e telefonit të saj celular të hiqet, në mënyrë që të mund ta ndihmojmë edhe hetuesin në këtë mënyrë”, shtoi ajo.
Më tej, acokatja e adoleshentes shpjegon edhe procedurat hetimore që po ndiqen.
“Tani për tani jemi në fazën kur hetimi është “në zhvillim e sipër”, gjë që do të kërkojë kohë dhe kjo kohë është shumë e rëndësishme. Sa më mirë ta lidhin autoritetet këtë çështje, aq më mirë do të shkojnë gjërat në gjykatë, në mënyrë që gjyqtarët të mund të bëjnë atë që duhet të bëjnë dhe atë që duam ne. Ne duam që të shihen të gjithë pjesëmarrësit në këtë tragjedi, ku humbën ky burrë (pronari 68-vjeçar) dhe kujdestari. Të gjitha pyetjet do të marrin përgjigje nga hetimi, ato do t’i jepen gjykatës dhe gjyqtarët do të jenë në gjendje të kenë një gjykim të drejtë. Klienti im përjashton mundësinë që këta dy fëmijë papritur të kenë kryer një krim të tillë”
Ajo shprehet këmbëngulëse se sipas klientes, ka persona të tjerë të përfshirë apo organizatorë, deri tek familja dhe kërkon që të verifikohet gjithçka.
“Klientja ime kishte një sërë pyetjesh që në fillim dhe m’i bëri ato. Ajo vetë përjashton mundësinë që vetëm këta dy fëmijë që nuk kishin asnjë lidhje me xhaxhain e saj – i cili ishte një njeri shumë i mirë – papritur kryen një krim të tillë kundër një personi që nuk e njihnin, nuk kishin asnjë lidhje me të dhe në fund nuk kishin asgjë për të fituar nga e gjithë kjo”, shpjegoi avokati i mbesës së 68-vjeçarit.
Së fundmi, siç tha vetë: “Nëse do të ishte një grabitje apo një larje hesapesh, do të shihnim elementë të tjerë që tani nuk ekzistojnë. Mendja e klientes sime po shkon kudo, ajo nuk beson se do të gjendet një fajtor, por shumë më tepër – si nxitës ose si bashkëpunëtorë të domosdoshëm – si nga mjedisi familjar ashtu edhe jashtë tij”.
“I gjithë materiali që ka mbërritur nga përgjigjet e ndryshme që oficerët e policisë prisnin dhe veprimet e ndryshme që janë ndërmarrë gjatë hetimit paraprak i është dhënë hetuesit kompetent, i cili e ka avancuar më tej hetimin. Pamë një ditë më parë se janë thirrur dëshmitarë, ajo ka marrë deklarata të plota nga dy të akuzuarit, diçka që policia nuk pati kohë ta bënte në këtë hetim paraprak. I gjithë ky material shtesë është dhënë, kështu që besoj se në rast se del diçka, nëse në fund të fundit ka persona të tjerë të përfshirë, do të jepet një urdhër në ditët në vijim për të vepruar në përputhje me rrethanat”, tha zëdhënësja e shtypit e Policisë Helenike, Constantia Dimoglidou.
Për ngjarjen janë arrestuar deri tani dy 22-vjeçarë, shok mes tyre, ku njëri është një ish-punëtor i viktimës që e akuzonte atë për abuzim seksual dhe kërkonte ta shantazhonte për qëllime përfitimi, kurse tjetri një greko-britanik që besohet se ka tërhequr këmbëzën e pistoletës, duke vrarë grekun dhe shqiptarin.
“Deri më tani, asgjë e tillë nuk ka ndodhur, asgjë më shumë nuk është kërkuar nga oficerët e policisë. Ne jemi në bashkëpunim me autoritetin hetimor, në rast se ndonjë person tjetër është i përfshirë, për të ndihmuar”, tha zëdhënësja e policisë.
