Një shtetas italian është arrestuar në Tiranë nga efektivët e Komisariatit Nr. 6 dhe ata të Policisë Rrugore, pasi kis...
BOTA
VIDEO/ Breshër në madhësinë e topave të golfi në periferi të Zyrihut! Të paktën 40 të plagosur
PiranjatPërditësimi i fundit 29 Gusht 2026, 18:51
Një stuhi e rrallë dhe ekstremisht e fuqishme breshëri ka goditur qytetin e Winterthurit dhe zonën e Ueterlandit në kantonin e Zyrihut këtë të premte, duke shkaktuar kaos, të lënduar dhe dëme masive materiale.
Sipas meteorologëve, i gjithë fenomeni zgjati vetëm pesë minuta, me erëra që arritën shpejtësinë nga 80 deri në 130 kilometra në orë dhe kokrra breshëri në madhësinë e topave të golfi apo tenisit. Moti i keq i zuri qytetarët dhe autoritetet plotësisht në befasi, ndërsa pasojat më të rënda u regjistruan në shkollën fillore Rychenberg dhe objekte të tjera arsimore në Winterthur, ku stuhia shpërtheu gjatë pushimit të mëngjesit.
Dhjetëra fëmijë pësuan gërvishtje në kokë si dhe mavijosje në shpatulla, krahë e këmbë nga goditjet e breshërit. Administrata e shkollës njoftoi menjëherë prindërit, ndërsa mësuesit u dhanë ndihmën e parë nxënësve të prekur dhe mbështetje psikologjike fëmijëve të frikësuar.
Pasojat e fenomentit ishin shkatërruese edhe për automjetet, ndërtesat dhe institucionet kulturore. Shërbimet e emergjencës dhe ambulancat u mobilizuan me shpejtësi në gjithë zonën për transportimin e të plagosurve dhe pastrimin e rrugëve nga pemët e rrëzuara.
Breshëri shkaktoi çati të dëmtuara, dritare të thyer në banesa e shkolla, si dhe dëme të konsiderueshme materiale në Muzeun e Artit në Winterthur. Gjithashtu, dhjetëra makina që udhëtonin në autostradë pësuan xhama të thyer dhe vrima në karroceri, duke u detyruar të ndalonin me urgjencë në korsinë e emergjencës.
Mediat e huaja raportojnë se, eksperti Marco Stoll nga Meteo Schweiz deklaroi se breshëri i këtij niveli është një ngjarje ekstremisht e rrallë që ndodh zakonisht vetëm një herë në vit, ndërsa stuhia lëvizte me një shpejtësi mbresëlënëse prej rreth 100 kilometrash në orë.
Banorët lokalë përshkruan çastet e panikut ku era e fortë errësoi gjithçka përpara se breshëri të derdhej mbi qytet. Kryetari i bashkisë së Seuzach konfirmoi se vendi u përball me një ngjarje dramatike të paprecedentë, duke bërë që të aktivizohet menjëherë Organizata e Menaxhimit të Krizave për përballimin e emergjencës.
