Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
VOA: Blloqet e baltës ‘bateri' që magazinojnë nxehtësi
n.fPërditësimi i fundit 27 Maj 2024, 22:50
Foto ilustruese
SHBA- Një firmë në Kaliforni thotë se mund të ndihmojë në uljen e ndotjes nga dioksidi i karbonit në fushën e manifakturës duke përdorur atë që e quan bateri prej balte. Korrespondenti i Zërit të Amerikës, Matt Dibble, njofton se në vend që të ruajë energji elektrike, e ashtuquajtura bateri e rrallë, ruan nxehtësi.
Energjia e ripërtëritshme po bëhet më e lirë se energjia e përftuar nga lëndët fosile. Por përparimet në fushën e energjisë së pastër kanë ngecur në një fazë ku mund të ndihmojnë më së shumti, në manifakturë. Faza e prodhimit kërkon ngrohje të vazhdueshme, në disa raste për 24 orë në ditë, thotë për Zërin e Amerikës John O’Donnell, shef i firmës Rondo Energy.
“Sektori i prodhimit zë vendin e parë për konsumin e energjisë në botë. Nxehtësia e përdorur për prodhimin e sendeve është sa një e katërta e të gjithë qymyrit, naftës dhe gazit natyror në botë”.
Energjia elektrike e përftuar nga era dhe dielli tjetërsohet në nxehtësi të qëndrueshme në atë që kompania e zotit O'Donnell, e quan bateri të nxehtësisë. Këto blloqe balte kanë brenda tyre rezistenca sikurse furnelat elektrike.
“Na lindi ideja se si mund ta shfrytëzojmë këtë material të përdorur për 200 vjet dhe ta ndërthurim me materiale të shekullit të 19 që të ndërtojmë një infrastrukturë energjetike për shekullin e 21-të”, thotë zoti O’Donnell.
Kjo furnelë elektrike gjigande nxeh format komplekse të blloqeve në mënyrë të barabartë dhe kjo nxehtësi magazinohet për ditë të tëra.
“Ky bllok ruan po aq energji sa bateria e makinës Tesla X. Me rreth 3 mijë blloqe formojmë një bateri të vetme ngrohje”.
Këto blloqe të nxehta mund ta ngrohin ajrin në mbi 1000 gradë Celsius dhe mund të përdoren nga kompanitë që prodhojnë ushqime, karburant etj. Bateria e parë e nxehtësisë u përdor në vitin 2023 nga një fabrikë biokarburantesh në Kaliforni.
“Zëvendësimi i djegies me erën dhe diellin përgjysmon emetimet e karbonit në procesin e prodhimit të biokarbureve”, thotë zoti O’Donnell.
Blloqet prodhohen në shkallë të gjerë në një fabrikë në Tajlandë. Me planet për të ndërtuar fabrikën më të madhe në botë të baterive të këtij lloji, dhe një marrëveshje me prodhuesin kryesor të energjisë së ripërtëritshme EDP, për të siguruar ngrohje industriale me zero karbon, blloqet e firmës Rondo mund të jenë gati të shkëlqejnë.
