Zyrtarët amerikanë: Dyshojmë se personi brenda automjetit "Tesla" që shpërtheu në Las Vegas, vrau veten

SHBA- Personi brenda Teslës së tipit ‘Cybertruck’ që shpërtheu dhe u përfshi nga flakët para hotelit të kompanisë Trump të presidentit të zgjedhur Donald Trump në Las Vegas, kishte pësuar një goditje me armë në kokë para shpërthimit, thanë zyrtarët të enjten.

Sherifi i qarkut Clark, Kevin McMahill tha në një konferencë shtypi se një pistoletë u gjet në këmbët e personit që është identifikuar si Matthew Livelsberger. Zyrtarët besojnë se bëhet fjalë për vetëvrasje. Livelsberger shërbente në Beretat e Gjelbërta, forcat elitë të specializuara për të luftuar terrorizmin jashtë vendit dhe për të trajnuar forcat partnere, tha në një deklaratë ushtria amerikane.

Ai shërbente në ushtri që nga viti 2006, me një karrierë të gjatë, përfshirë dy ture në Afganistan dhe shërbime në Ukrainë, Taxhikistan, Gjeorgji dhe Kongo, tha ushtria amerikane. Ai është vlerësuar me dy yje bronzi, përfshirë një për trimëri për guxim nën zjarr, një distinktiv të këmbësorisë luftarake dhe një medalje për trimëri.

Livelsberger ishte me leje kur vdiq, sipas deklaratës. FBI tha të enjten në një postim në X se bënte kontrolle në një shtëpi në Kolorado në lidhje me shpërthimin e së mërkurës, por nuk dha detaje të tjera.

Shpërthimi i kamionit, i mbushur me fishekzjarre dhe bombola karburanti, ndodhi disa orë pasi 42-vjeçari Shamsud-Din Bahar Jabbar përplasi një kamion në një turmë në një lagje të famshme të Nju Orlinsit në ditën e Vitit të Ri, duke vrarë të paktën 15 persona përpara se të qëllohej për vdekje nga policia./ VOA

tesla