Teksa pritet që të nisë pas pak protesta e qytetarëve para bulevardit Dëshmorët e Kombit, policia ka marrë masa.
Siç ...
EDITORIAL
Nga ‘vjedhje’ te ‘favorizim’/ SPAK bën autogol me Ahmetajn – në dosjen ‘Buka’ nuk vodhi, por prapë në burg
PiranjatPërditësimi i fundit 21 Shtator 2025, 14:54
Ish-zv.kryeministri Arben Ahmetaj ka shpërndarë një e-mail shoqëruar me dokumente, ku denoncon atë që e quan presion politik, persekutim personal dhe familjar në lidhje me çështjen “Buka Sh.a”.
Më 28 shtator 2023, Prokuroria e Posaçme (SPAK) i komunikoi akuzën ish-ministrit të Ekonomisë, Arben Ahmetaj, duke e marrë të pandehur në çështjen e privatizimit të ndërmarrjes shtetërore “Buka”.
Në aktakuzën e dorëzuar në gjykatë, SPAK argumentonte se Ahmetaj kishte shkelur ligjin duke i shkaktuar dëm shtetit.
“Nga analizimi i dokumentacionit shkresor të administruar në dosjen hetimore dhe provave të mbledhura deri në këtë fazë, në përfundimin e tyre, provohet që në origjinë se Arben Ahmetaj, në rolin e ish-ministrit të MZHETTS, ka vepruar në kundërshtim me legjislacionin në fuqi... duke dëmtuar interesat e ligjshme të shtetit dhe të shtetasve,” thuhet në aktakuzën e ngritur nga prokurori Elvin Gokaj.
Aktakuza, ku SPAK akuzon Ahmetajn per demtimin e interesave te shtetit
Paralelisht me aktakuzën, mediat u mbushën me lajme se me privatizimin e ndërmarrjes Buka, shtetit i ishin vjedhur 7 miliardë lekë, dhe sigurisht origjina e këtyre lajmeve nuk ishin gazetarët, por burimet brenda në SPAK.
Për gati tre vjet radhë, SPAK vijoi hetime intensive për dosjen Buka. Dhe ruajti të njëjtën vijë akuzë edhe në kërkesën për dërgimin e çështjes për gjykim, në 30 qershor të këtij viti.
Kerkesa e dergimit per gjykim, 30 qershor 2025
Por një muaj më vonë, gjatë përballjeve në gjykatë me avokatët mbrojtës të Ahmetajt, prokurori Gokaj bëri një kthesë 180 gradë në akuzën kundër Ahmetajt. Zoti Gokaj deklaroi në gjykatë dy muaj më parë, se nuk ka pretenduar ndonjëherë që Ahmetaj ka dëmtuar interesat e shtetit.
"Në asnjë rast nuk kam pretenduar që i kanë ardhur dëm interesave të shtetit, por të shtetasve. Mund të jetë një lapsus. Edhe tek kërkesa për gjykim, përfundimi i hetimeve nga unë është hetuar për dëmin që i ka shkaktuar familjes Myderizi," deklaroi prokurori gjatë përballjes në gjykatë.
Deklarimet e prokurorit Gokaj ne Gjykate
Pra vjedhja e 7 miliard lekëve të shtetit u shndërrua në lapsus si pa gjë të keqe. Dhe për t'i shkuar çmendinës deri në fund, tani prokuroria kërkon dënim me burg për Ahmetajn, jo se ka dëmtuar shtetin, por sepse e ka favorizuar atë duke i dhënë më shumë aksione në ndërmarrjen Buka nga sa i takonin.
Nga të gjitha dosjet hetimore të Prokurorisë së Posaçme, ajo e privatizimit të ndërmarrjes Buka është më diskretituesja për këtë institucion. Së pari, kjo është një dosje thellësisht jo profesionale. Konsideroni vetëm diçka.
Shteti dhe pronarët e truallit zotëronin 50.7 për qind të aksioneve së bashku në ndërrmarjen Buka. Pjesa tjetër prej 49.7 për qind zotërohej nga privatë dhe ish punonjës.
Tani si u ndanë këto 50.7 për qind e aksioneve pas vlerësimit të ekspertit të pavarur që angazhoi ministria e Ekonomisë? Shteti mori 45.97 për qind, ndërsa pronarëve iu njoh 4.73 për qind e aksioneve. SPAK e akuzon Ahmetajn për shpërdorim detyre, pasi duhet t'i kishte ndarë aksionet 26.17 për qind për pronarët e truallit dhe 24.53 për qind për shtetin.
Vetëm dy llogari të shpejta. Në ndërmarrjen Buka shteti zotëronte 32 mijë metër katror truall, 16 ndërtesa me 10 mijë metër katrorë ndërtim si dhe të gjitha makineritë dhe pajisjet. Ndërsa pronarët e truallit zotëronin vetëm 8 mijë metër katror truall. Pra, sipas SPAK, pronarëve që kishin gjithsej 8 mijë metër truall iu takonte 26.17 për qind e aksioneve, ndërsa shtetit me 32 mije metër katrorë truall, 10 mijë metër katrorë ndërtim dhe të gjitha makineritë i takonte 24.53 për qind.
Por mungesa e profesionalizmit është problemi më i vogël i asaj dosje. Ky është një hetim, i cili ka dyshime shumë të forta për motive të tjera, përtej drejtësisë dhe të vërtetës.
SPAK ka hetuar plot tre vjet për ndërmarrjen buka. Por siç pranon dhe vet prokurori nuk ka gjetur dot lidhje, transaksione apo njohje mes biznesmenit Lirim Fezollari dhe Arben Ahmetajt. Në vend të kësaj, gjeti lidhje dhe njohje të Endri Duçkës dhe një Endri tjetër që tani thuhet se është arratisur. Dhe këtu SPAK ka bërë dhe një tjetër lapsus, teksa e cilëson Duçkën si sekretar i përgjithshëm i ministrisë së Ekonomisë, ndërkohë që ai ka qenë drejtor i pronave në ministrinë e Financave, e cila në atë kohë drejtohej nga Shkëlqim Cani. Por SPAK-ut nuk i intereson Duçka.
Ndaj Duçka lëviz lirshëm nëpër Tiranë sepse, me sa duket, shënjestra ka qenë Ahmetaj. Dhe kur hetimet bëhen me shënjestra, drejtësia ka vdekur. Me paçavuren Buka, tashmë gjithkush ka të drejtën legjitime të dyshojë se në SPAK ka dhe axhenda, fijet e të cilave dirigjohen politikisht. Dhe ky është dëm shumë më i madh se sa mosdënimi i të korruptuarve.
