Protestuesit janë shpërndarë pas hedhjes së ujit te Bulevardi.
Protestuesit janë ‘strehuar’ te Parku ‘Rinia’...
KOSOVA
Kurti: “Shtëpia e Verdhë” nuk ka ekzistuar, UÇK nuk ka kryer krime!
PiranjatPërditësimi i fundit 18 Shkurt 2026, 11:29
Kryeministri i Kosova, Albin Kurti, ka hedhur poshtë pretendimet se pjesëtarë të UÇK janë përfshirë në trafik organesh, duke i cilësuar si një “narrative hibride” me qëllim njollosjen e luftës çlirimtare dhe imazhit ndërkombëtar të Kosovës.
Në një deklaratë të publikuar gjatë hapjes së Konferencës së Dytë Shkencore Ndërkombëtare të Institutit për Krimet e Kryera gjatë Luftës në Kosovë, Kurti tha se e ashtuquajtura “Shtëpi e Verdhë” nuk ka ekzistuar kurrë dhe se akuzat janë përdorur për të deformuar të vërtetën historike. Ai theksoi se lufta e UÇK-së ishte e drejtë dhe e domosdoshme, për liri dhe mbijetesë, dhe nuk kishte synuar dhunë apo pushtet ndaj popujve të tjerë.
Kurti shtoi se deklaratat që lidhen me “Shtëpinë e Verdhë” janë pjesë e përpjekjeve të Serbisë dhe faktorëve të tjerë ndërkombëtarë për të cenuar legjitimitetin e luftës së UÇK-së. Ai riktheu gjithashtu vëmendjen tek të tjera krime të dokumentuara ndërkombëtarisht, siç ishte “Sarajevo Safari”, duke theksuar se për hetimin dhe gjykimin e tyre do të duhej një gjykatë speciale.
“Lufta e UÇK-së ishte e drejtë dhe e domosdoshme, për liri dhe mbijetesë, jo nga dëshira për dhunë apo pushtet. Ajo ishte përgjigje ndaj një regjimi shtypës, ndaj represionit sistematik deri në aparteid dhe mohimit të të drejtave themelore të popullit tonë deri në gjenocid. Seancat gjyqësore që po zhvillohen aktualisht në Hagë nuk mund të vënë në dyshim karakterin çlirimtar e antikolonialistë të luftës sonë, as aspiratën legjitime të Kosovës për liri, barazi dhe dinjitet njerëzor. E ashtuquajtura “Shtëpi e Verdhë” në Shqipëri nuk ka ekzistuar kurrë si vend për trafikimin e organeve nga pjesëtarë të UÇK-së, por është pjesë e narratives hibride të Serbisë kundër UÇK-së dhe Shqipërisë, e iniciuar nga deputeti rus Konstantin Kosachev më 15 prill 2008, pra as dy muaj pas shpalljes së pavarësisë së Kosovës. “Shtëpi të Verdhë” nuk ka, por ka gjithnjë e më shumë informacione, dëshmi e fakte se ka pasur “Sarajevo Safari” ku rol thuhet të ketë pasur edhe presidenti i Serbisë, Aleksander Vuçiq, me ç’rast për një shumë të hollash, nga kodrat përreth Sarajevës mund të qëlloje boshnjak civilë me snajperë në qytetin e rrethuar në fillim të viteve ’90. Për të hetuar e gjykuar krimet e “Sarajevo Safari” do të duhej të angazhohej ndonjë gjykatë speciale ndërkombëtare. Fjala e plotë në hapjen e Konferencën e Dytë Shkencore Ndërkombëtare të Institutit të Krimeve të Kryera gjatë Luftës në Kosovë “Nga lufta në rimëkëmbje”: I nderuari z. Atdhe Hetemi, Drejtor Ekzekutiv i Institutit për Krimet e Kryera Gjatë Luftës në Kosovë, I nderuari profesor Arben Hajrullahu, Rektor i Universitetit të Prishtinës, Të dashur familjarë të viktimave dhe ju të mbijetuar, Të nderuar përfaqësues të institucioneve vendore dhe ndërkombëtare, Të nderuar profesorë, studiues dhe studentë nga Kosova dhe nga bota, Të nderuar përfaqësues të shoqërisë civile, Të nderuar të pranishëm, Zonja dhe zotërinj, Në këtë ditë të shënuar për shtetin tonë, po i hapim punimet e konferencës ndërkombëtare “Nga lufta në rimëkëmbje”. Nuk ka simbolikë më të fuqishme se sa ta lidhim Ditën e Pavarësisë me përgjegjësinë tonë për reflektimin shkencor dhe institucional mbi plagët e luftës dhe rrugën e rimëkëmbjes sonë. Përtej një aktiviteti akademik, kjo konferencë është pjesë e procesit të gjerë shtetëror dhe shoqëror për përballje me të kaluarën, për dokumentim të së vërtetës dhe drejtësi. Sepse pavarësia jonë, krahas së qeni një akt politik demokratik, është edhe obligim moral kujtese ndaj të dashurve që na i vranë dhe përgjegjësi ndaj brezave që do të vijnë.”, tha ndër të tjera Kurti.
