Është nën kontratë me Mallorca-n deri në 2028, por në Spanjë dhe Turqi, e bëjnë të sigurt rikthimin e Vedat ...
KOSOVA
Osmani kritikon BE-në: Aplikimi ynë i vitit 2022 ndodhet në sirtarët e tyre
PiranjatPërditësimi i fundit 14 Nëntor 2025, 18:22
Presidentja e Kosovës, Vjosa Osmani, në një intervistë për “Politico” ka kritikuar Bashkimin Evropian, meqë sipas saj Brukseli zyrtar duket se nuk e sheh dhe nuk e ndjenë progresin që ka bërë Kosova.
Osmani në këtë intervistë ka thënë se Kosova nuk bën flirt me vende të tjera e fuqi keqdashëse si Rusia, Kina e Irani, të cilat i quan edhe si “trekëndëshi i së keqes”, por në të njëjtën kohë ndjen se puna s’po i vlerësohet.
Presidentja kosovare ka thënë se rruga integruese e Kosovës mbetet e bllokuar dhe sipas saj, procesi i bazuar në merita, për të cilin BE-ja flet aq shumë, ende s’po shihet në praktikë.
“Por në të njëjtën kohë, nuk e ndiejmë që ky qasje pro-evropiane dhe fakti që ne jemi 100% të përafruar me politikën e përbashkët të jashtme dhe të sigurisë së BE-së është parë ose vlerësuar. Përkundrazi, duket sikur merret si e mirëqenë. 97% e njerëzve, sigurisht, janë pro-evropianë. Reformat tona në ekonomi, në sundim të ligjit, sidomos në luftën kundër krimit dhe korrupsionit, kanë qenë thelbësore. Megjithatë, në rrugën tonë të integrimit evropian, jemi të bllokuar. Dhe duket sikur procesi i bazuar në meritë, për të cilin BE-ja flet aq shumë, mbetet diçka që duhet të vijë. Unë ende nuk e shoh të ndodhë”, ka thënë Osmani në “Politico.
Sa i përket mundësisë që Gjermania të shtyjë përpara procesin integrues të Kosovës, Osmani ka thënë se shpreson që të ndodh një gjë e tillë, meqë Kosova s’po kërkon bamirësi, por shtyrje përpara bazuar në merita.
Osmani ka përmendur edhe faktin që BE ende s’e ka shqyrtuar aplikacionin e Kosovës për të marrë statusin e vendit kandidat, duke thënë se ai s’është shqyrtuar dhe se ndodhet diku në sirtarët e BE-së.
“Por shpresoj, ashtu siç thatë ju, që Gjermania do të luajë atë rol udhëheqës në shtyrjen e një procesi të bazuar në meritë, sepse ne nuk po kërkojmë bamirësi. Nuk po kërkojmë rrugë të shkurtër. Po kërkojmë, pikërisht, respekt për punën që bëjmë dhe pranimin e reformave që ne ndërmarrim. Dhe nëse kjo do të merret parasysh, Kosova do të bëhej vendi udhëheqës. Por realiteti është se tani për tani, aplikimi ynë as nuk është shqyrtuar. Ne aplikuan në dhjetor 2022, dhe tani jemi pothuajse në dhjetor 2025. Ai ndodhet diku në sirtarët e Bashkimit Evropian, por nuk po ecën përpara”, ka thënë Osmani.
Presidentja kosovare ka thënë se Kosova nuk duhet parë më si barrë.
“Ne kemi popullsinë më të re në Evropë, e cila është e aftë, shumëgjuhëshe, më e mira në Evropën Juglindore për konkurrueshmëri në IT. Ata janë të shkëlqyer. Pra, është kapitali njerëzor, është potenciali ekonomik që është i madh. Dhe në të njëjtën kohë, mendoj se duhet parë edhe si një domosdoshmëri strategjike. Ballkani Perëndimor që nuk është i paqes, i qëndrueshëm dhe i sigurt, do të thotë një Evropë që nuk është e paqes, e qëndrueshme dhe e sigurt”, ka shtuar ajo.
