Një aksident rrugor është regjistruar paraditen e kësaj të enjte (4 qershor 2026) në Tiranë, pranë Fabrikës s&eum...
KOSOVA
Procesi zgjedhor, Prokuroria e Kosovës: Janë raportuar disa incidente, nuk ka asnjë person të ndaluar
PiranjatPërditësimi i fundit 12 Tetor 2025, 16:09
Koordinatorja nacionale për zgjedhje nga Prokuroria e Shtetit, prokurorja Laura Pula, ka deklaruar se deri në mesditë janë raportuar rreth tetë raste si incidente gjatë procesit zgjedhor, por asnjë prej tyre nuk ka përmbajtur elemente të veprës penale.
Në një deklaratë për mediat, Pula konfirmoi gjithashtu se nuk është arrestuar asnjë person për keqpërdorim të votës në zgjedhjet lokale që po mbahen sot në Kosovë.
“Deri më tani nuk kemi asnjë person të ndaluar për ndonjë vepër penale që ka të bëjë me të drejtën e votimit. Rastet e raportuara janë verifikuar dhe nuk janë gjetur elemente të mjaftueshme për veprim penal,” deklaroi ajo.
Sipas prokurores, në terren janë të angazhuar rreth 100 prokurorë dhe staf mbështetës, të shpërndarë në të gjitha komunat e Kosovës, me qëllim të mbrojtjes së votës së lirë dhe ndëshkimit të çdo përpjekjeje për manipulim.
Pula shpjegoi se incidentet gjatë ditës zgjedhore kategorizohen në tri grupe: shkelje administrative, kundërvajtje dhe vepra penale, kjo e fundit e trajtuar nga Prokuroria kur verifikohen elementet e nevojshme ligjore.
Ajo përmendi edhe tri raste të raportuara për fotografim të votës, por sqaroi se pas intervistimit, personat janë liruar pasi nuk është gjetur ndonjë qëllim penal pas veprimit të tyre.
“Çdo person që fotografon votën do të ndalohet dhe do të hetohet për motivin e veprimit. Nëse konstatohet se ka qëllim përfitimi, presioni apo shkelje të tjera, atëherë rasti kalon në kompetencën e Prokurorisë,” shtoi ajo.
Ndërkohë, ushtruesi i detyrës së Kryeprokurorit të Shtetit, Besim Kelmendi, ka vizituar sot Dhomën operative për monitorimin e procesit zgjedhor, ku është pritur nga prokurorja Pula dhe është informuar mbi rrjedhën e procesit dhe masat mbrojtëse të ndërmarra për garantimin e integritetit të zgjedhjeve.
