Hetuesit e ngjarjes së ndodhur në stacionin e karburantit “EIDA” në zonën e Brrylit në Tiranë nuk kanë ende nj&...
KOSOVA
Sot vazhdon seanca për konstituimin e Kuvendit në Kosovë, emrat që pritet të propozohen për kryetare dhe nënkryetare
PiranjatPërditësimi i fundit 9 Shtator 2026, 10:05
Pas më shumë se një muaji pritje, deputetët e Kuvendit të Kosovës pritet të mblidhen sot për të vazhduar seancën konstituive të legjislaturës së 11-të.
Seanca është thirrur për në orën 11:00 nga kryesuesi Avni Dehari, ndërsa në rend dite janë zgjedhja e kryetarit dhe e nënkryetarëve të Kuvendit.
Lëvizja Vetëvendosje pritet ta rikandidojë Albulena Haxhiun për kryetare të Kuvendit. Partia Demokratike e Kosovës pritet ta propozojë Vlora Çitakun për nënkryetare, ndërsa Lidhja Demokratike e Kosovës, Kujtim Shalën.
Vazhdimi i seancës vjen pas një bllokade politike dhe tejkalimit të afatit kushtetues për konstituimin e Kuvendit, shkruan KosovaPress. Afati prej 30 ditësh kishte përfunduar më 7 gusht, ndërsa seanca e fundit ishte mbajtur një ditë më vonë. Prej atëherë, Kuvendi nuk është mbledhur për ta përfunduar procesin e konstituimit.
Kryesuesi i seancës, Avni Dehari, më 4 shtator njoftoi se vazhdimin do ta thërriste për sot, pas marrëveshjes së arritur ndërmjet Lëvizjes Vetëvendosje dhe Lidhjes Demokratike të Kosovës për çështjen e presidentit.
Megjithatë, Dehari kishte pranuar se ende nuk ka qartësi të plotë nëse ekziston numri i nevojshëm i deputetëve për përfundimin e procesit.
Ai kishte kërkuar që marrëveshja ndërmjet dy partive të shoqërohej me përgjegjësi konkrete dhe gatishmëri të deputetëve për përmbushjen e obligimeve kushtetuese, duke theksuar se vendi nuk ka nevojë për një zvarritje tjetër të procesit.
VV-ja dhe LDK-ja kanë arritur marrëveshje që profesori universitar Bekim Sejdiu të jetë kandidat i përbashkët për president. Megjithatë, marrëveshja është kundërshtuar nga gjashtw deputetë të LDK-së, çka ka ngritur pikëpyetje nëse ekzistojnë votat e mjaftueshme për realizimin e saj.
Pavarësisht kritikave për tejkalimin e afatit kushtetues, PDK-ja dhe LDK-ja kanë konfirmuar pjesëmarrjen në seancën e sotme.
Ndryshe nga këto dy parti, Aleanca ka vendosur të mos marrë pjesë.
Pas mbledhjes së Kryesisë së Aleancës të martën, kryetari i saj, Ardian Gjini, deklaroi se vendimi për mospjesëmarrje ka marrë mbështetjen e shumicës dërrmuese të deputetëve dhe anëtarëve të Kryesisë.
Sipas Gjinit, pjesëmarrja në seancë do të nënkuptonte legjitimim të asaj që Aleanca e konsideron shkelje të Kushtetutës.
Ai ka thënë se Kuvendi mund të konstituohet edhe sot, por ka paralajmëruar se, nëse procesi zhvillohet pa respektuar procedurat kushtetuese, çështja mund të përfundojë sërish në Gjykatën Kushtetuese.
Për konstituimin e Kuvendit duhet të zgjidhen kryetari dhe pesë nënkryetarët. Kryetari propozohet nga grupi më i madh parlamentar dhe për zgjedhjen e tij nevojiten së paku 61 vota të deputetëve.
Tre nënkryetarë propozohen nga tri grupet më të mëdha parlamentare, ndërsa dy pozitat e tjera u takojnë komuniteteve joshumicë, një komunitetit serb dhe një komuniteteve të tjera.
Nëse deputetët arrijnë t’i zgjedhin kryetarin dhe nënkryetarët, do të përmbyllet procesi i konstituimit të Kuvendit dhe do t’i hapet rrugë hapave të tjerë për funksionalizimin e institucioneve të reja./KosovaPress/
